Назорат постлари криминалнинг уясими? ИИВ ўринбосари Дадахўжаевга қарши чиқди

Категориялар 9024
image

Сўнгги ҳафта ҳудудлардаги ички назорат постларининг тикланишига доир турли фикрлар турли ОАВ ва ижтимоий тармоқларда кенг муҳокамаларга сабаб бўлмоқда. Жумладан, Qalampir.uz ҳам биринчилардан бўлиб ушбу мавзу ҳақида туркум мақолалар эълон қилган эди.

Кеча, 13 декабрь куни Сенатнинг Мудофаа ва хавфсизлик масалалари қўмитасининг навбатдаги мажлисида қўмита раиси, сенатор Фаррух Дадахўжаев ички назорат постлари фаолиятига тўхталар экан, уларнинг ҳар бири криминалнинг уяси экани, ноқонуний постлар борлиги ҳамда йўл бўйларида “Stop” белгисини қўйишда қонунбузилишлар кузатилиши ҳақида алоҳида таъкидлаган эди.

Ўзбекистон Республикаси Ички ишлар вазирининг ўринбосари Азизбек Икромов сенатор Фаррух Дадахўжаевнинг фикрларига ўз эътирозини билдирар экан, жумладан, шундай деди.

“Бундай субъектив ёндашув Фаррух Дадахўжаев томонидан илгари ҳам, профилактика инспекторларининг хизмат машиналарига бензин қуйиш нонвойчиларга қолиб кетган, деб билдирган фикрида ҳам кузатилган эди”, - дейди у.

Азизбек Икрамовнинг изоҳ беришича, ички ишлар органларининг асосий вазифалари фуқароларнинг ҳуқуқлари, эркинликлари ва қонуний манфаатларини, жисмоний ва юридик шахсларнинг мулкини, конституциявий тузумни ҳимоя қилишдан, қонун устуворлигини, шахс, жамият ва давлатнинг хавфсизлигини таъминлашдан, шунингдек, ҳуқуқбузарликларнинг олдини олиш ва профилактикасидан иборатдир.

“Халқ посбони бўла туриб, ҳуқуқбузарлик содир этган ҳар қандай ходим қатъий жавобгарликка тортилади. Бироқ ҳеч кимнинг ички ишлар органи ходимларини қонунчиликни бузишда асоссиз айблашга хаққи йўқ. 

Мутассади раҳбарлардан оммавий ахборот воситаларига баёнот беришда аниқ фактларга асосланишларини ва ноўрин ҳамда ҳақоратомуз гаплардан қочишларини талаб қиламан.

Шунингдек, “Тўхтамасдан ҳаракатланиш тақиқланган” (“Stop”) белгисини ўрнатилиши тартиби Ўзбекистон Республикаси Вазирлар Маҳкамасининг 2015 йил 24 декабрдаги 370-сон қарори билан тасдиқланган “Йўл ҳаракати қоидалари”нинг 1-иловасида аниқ белгилаб қўйилганлигини, ички ишлар органлари эса белгиланган тартибни ижрочиси эканлигини эслатиб ўтмоқчиман”, - дея ўз муносабатини ифодалаган Ички ишлар вазирининг ўринбосари Азизбек Икромов.

Сарвар Анвар ўғли
Мақолага баҳо беринг
Баҳолаганлар: 324
Рейтинг: 2.9
t
×