Шавкат Мирзиёев Оксана Чусовитинани фахрий унвон билан тақдирлади

Спорт 10228
image

Шавкат Мирзиёев Оксана Чусовитинани фахрий унвон билан тақдирлади

Хабарингиз бор, бугун, 13 август куни Ўзбекистон Президенти Шавкат Мирзиёев Токио Олимпиадасида иштирок этган спортчилар, уларнинг ота-оналари ва мураббийлари билан учрашди.

Учрашув давомида Президент Шавкат Мирзиёев кўп йиллар давомида спорт гимнастикаси билан шуғулланиб, халқаро миқёсда шуҳрат қозонган спортчи, кетма-кет 8 карра Олимпия ўйинллари иштирокчиси бўлган Оксана Чусовитинанинг хизматларини алоҳида ҳурмат билан тилга олди. 

Чусовтина илк бор 1992 йилда Барселонада ўтказилган Олимпиадада қатнашган. Ўшандан буён у Олимпия ўйинларида иштирок этиш ҳуқуқини узлуксиз ва кетма-кет саккиз марта қўлга киритган ва бу натижа Гиннеснинг рекордлар китобига киритилган.

“Оксана Александровнанинг навбатдаги иштироки Токио Олимпиадасининг муҳим воқеаси сифатида эътироф этилди. Дунё ҳамжамияти Оксананинг чиқишини катта завқ ва ҳаяжон билан кузатар экан, Чусовитинанинг матонатига, ўз ишига бўлган садоқатига тан берди. Ҳаётини спортга, бундай йирик мусобақада муваффақиятга эришишдек катта мақсадга бағишлаш учун зўр ирода ва фидойилик керак, десак айни ҳақиқатни айтган бўламиз. 

Бундай афсонавий спортчимиз билан ҳақли равишда фахрланамиз. Унинг мардлиги, ғалабага бўлган қатъий интилиши ёш спортчиларимиз учун муваффақият ва шуҳрат қозонишнинг ўзига хос ибрат мактаби бўлиб хизмат қилмоқда”, дейди Президент.

Шавкат Мирзиёев Токио Олимпиадасидаги иштироки ҳамда Ўзбекистон гимнастикасига қўшган ҳиссаси учун Оксана Чусовитинага “Ўзбекистон Республикасида хизмат кўрсатган спорт устози” фахрий унвони берилганини маълум қилди.

“Ҳурматли Оксана Александровна, Ватанимизга бўлган меҳрингиз ва садоқатингиз, спортдаги фидойилигингиз, букилмас ирода ва матонатингиз учун сизга яна бир бор катта миннатдорчилик билдираман”, дейди Президент.

Абдулла Маннонов
Мақолага баҳо беринг
Баҳолаганлар: 471
Рейтинг: 3
t
×