Тахтдан ўз оёғи билан кетаётган “Арқадағ”, “миналанган” Ўзбекистон элчихонаси, яна тилга тушган Қодиров… 12 февраль дайжести

Жамият 

Автомобилларни ижарага бериш соддалаштирилди

Ўзбекистон Республикаси Президенти жорий йилнинг 9 февраль куни “Фуқароларнинг ва тадбиркорлик субъектларининг ҳуқуқлари кафолатлари янада кучайтирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонунни имзолади.

Эндиликда, автомототранспорт воситалари электрон савдо платформаси воситасида электрон онлайн-аукцион орқали ижарага берилганда ижарага бериш шартномаларини нотариал тартибда тасдиқлаш талаб этилмайди. Бунда, электрон онлайн-аукцион натижаларига кўра расмийлаштирилган баённома ижара шартномаси кучига эга булади. Қўшимча ФКнинг 565-моддасига киритилди.

Зойир Мирзаевнинг тайинланганига бир ҳафта ҳам бўлмаган ўринбосари “қовун туширди”

Ижтимоий тармоқларда Тошкент вилояти ҳокимининг тайинланганига ҳали бир ҳафта ҳам бўлмаган биринчи ўринбосари Холмирза Ниёзов тонгги соат 07:00 га йиғилиш чақиргани айтилган хабар тарқалди. Бандлик ва меҳнат муносабатлари вазирлиги Матбуот хизмати бугун, 12 февраль куни соат 07:00 да ҳақиқатан ҳам мажлис ўтказилганини тасдиқлади.

Бугун эрталаб ушбу вазиятга аниқлик киритиш учун Давлат меҳнат инспекцияси бошлиғи Қудратулло Одинаев Тошкент вилояти ҳокимлигига борган. 

Инспекция ходимлари соат 07:10 атрофида ҳокимият биносига кириб борганда, мажлис ўтказилаётганини аниқлаган. Бироқ, йиғилганлар вазирлик вакилларини кўриши билан мажлисдан чиқиб кетган. 

Қодиров тирбандликни йўқотиш учун трамвайни қайтаришдан кўра тежамкор таклиф берди

Ўзбекистонда йўллардаги тирбандлик асосан талабалар ҳисобига юзага келмоқда. Йўлларда автобуслар учун алоҳида йўлаклар ажратилса, ҳаракат тартибга келиб, тирбандлик бартараф этилиши мумкин. “Миллий тикланиш” демократик партияси раиси Алишер Қодиров шундай фикр билдирди.

Қодиров автобус ҳаракати учун алоҳида, ажратиб қўйилган йўл бўлиши автобусни аниқ график асосида ҳаракатини таъминлашини қайд этиб, бу трамвай учун қайта тизим яратишдан арзонроққа тушишини айтиб ўтган. Сўзи исботи сифатида Туркиянинг Истанбул шаҳрини кўрсатган.

Шунингдек, депутат қонунлар борасида ҳам фикр билдириб, улар фақат инсонпарвар бўлиши эмас, инсонларни ҳимоя ҳам қилиши кераклигини таъкидлаган.

Тошкентда Меҳрибонлик уйи тарбиячиси болалардан бирини калтаклади

Тошкентнинг Юнусобод туманида жойлашган 21-сонли Меҳрибонлик уйида тарбияланаётган болага эркак тарбиячи куч ишлатиб, жисмоний тазйиқ ўтказгани аниқланди. Бу ҳақда ЎзА маълум қилди.

Қайд этилишича, жорий йилнинг январь ойида Бола ҳуқуқлари бўйича вакил номига Тошкент шаҳрида жойлашган 21-сонли Меҳрибонлик уйида тарбияланаётган А. исмли болага Б. исмли (эркак) тарбиячи куч ишлатиб, жисмоний тазйиқ ўтказаётгани ҳақида маълумот келиб тушган. Бола ҳуқуқлари бўйича вакил ушбу ҳолат юзасидан ўрганиш ўтказган.

Қодиров ОТМларда дарсни соат 10:00 дан бошлашни таклиф қилди

Ўзбекистон “Миллий тикланиш” демократик партияси раиси Алишер Қодиров мамлакатда талабалар дарсининг бошланиш вақтини суриш таклифи билан чиқди.

Депутатга кўра, Тирбандликни келтириб чиқараётган оқимнинг катта қисми талабалар. Тирбандлик эрталаб ўқишга келиш ва қайтиш вақтига тўғри келяпти.

“Нима учун давлат хизматида иш бошлаш вақтини 8:30, олийгоҳларда ўқиш бошлаш вақтини 10:00 га белгилаш мумкин эмас? Осмон узилиб ерга тушмайди, лекин жамоат транспортига ҳам, автойўлларга ҳам босим жиддий камаяди”, дейди депутат.

Муборак ИИБ бошлиғи ушланди. У пора билан ушланган “замҳоким”га алоқадор

Хабарингиз бор, Қашқадарё вилоят прокуратураси томонидан жорий йилнинг 6 февралида Миришкор тумани ҳокими ўринбосари У.Яхшиев тадбиркордан ер ажратиб бериш эвазига 80 минг АҚШ доллари пора талаб қилиб, шундан 50 минг АҚШ долларини олган вақтида жиноят устида ушланган эди. Ҳолат бўйича Жиноят кодексининг 168-моддаси 4-қисми “а” банди ва 28, 211-моддаси 3-қисми “а” банди билан жиноят иши қўзғатилиб, айбланувчи қамоққа олинган.

Қашқадарё виляоти прокуратураси мазкур ҳолат бўйича ўтказилган суриштирув юзасидан қўшимча маълумот берди.

Маълум қилинишича, Жиноят иши юзасидан ўтказилган дастлабки терговда ички ишлар органлари кадрлар заҳирасидаги ходим – Умид Яхшиев пора олиш жиноятини таниши Муборак туман Ички ишлар бўлими бошлиғи Х.Баҳриев билан олдиндан жиноий тил бириктирган ҳолда содир этганлиги аниқланган.

Тошкентда бедарак йўқолган икки қиз қидирилмоқда

Тошкент шаҳрида 20 ва 22 ёшли икки нафар қиз қидирилмоқда. Улар уйидан чиқиб кетгач, бедарак йўқолган. Бу ҳақда Тошкент шаҳар бош бошқармаси хабар бермоқда. 

Қайд этилишича, 2002 йилда туғилган Дилноза Баҳодир қизи Юнусова 2022 йил 7 февраль куни Сергели тумани, Сергели-7 массивида жойлашган уйидан чиқиб кетиб, бедарак йўқолган. 

Белгилари: бўйи 160-165 см, тана тузилиши ўртача, сочлари узун, қора,  кўзлари жигар. 

Кийимлари: қора куртка, пушти ранг, қора кроссовка. 

Шунингдек, 2000-йилда туғилган Камола Абдукарим қизи Назарқулова  2021 йил 12 октябрь куни “Қўйлиқ” бозоридан чиқиб, бедарак йўқолган. 

Зойир Мирзаев 30 йилдан буён ҳокимлар қадами етмаган қишлоққа борди

Тошкент вилояти ҳокими Зойир Мирзаев Тошкент вилояти Бўстонлиқ туманида жойлашган, 30 йилдан буён ҳокимлар қадам босмаган Писком қишлоғига борди. Бу ҳақда QALAMPIR.UZ журналисти Феруза Нажмиддинова воқеа жойидан хабар бермоқда.

Журналист Зойир Мирзаевга одатда ҳокимлар бирор бир ҳудудга боришидан олдин саҳналаштириш жараёнлари бўлиши, режа асосида ҳоким келишига ўзгача тайёргарлик кўрилиб, дастурхонлар тузатилиши мумкинлигини айтиб, “Мана шундай сохталиклар бўлишидан қўрқмайсизми?”, деб сўради.

“Шундай ҳолат кўрдингизми? Шунақа нарса борми? Мен келишимга кўзбўямачилик бўлса, мен даврага кирмасдан ҳам қайтиб кетавераман”, дейди ҳоким.

Олам

ЖССТ олими пандемия якуни бўйича хавотирли баёнот берди

COVID-19 пандемияси дунёда тугашига ҳали анча вақт бор, чунки коронавируснинг янги вариантлари пайдо бўлади. Бу ҳақда кеча, 11 февраль куни Жаҳон соғлиқни сақлаш ташкилоти (ЖССТ) бош олими Соумя Сваминатан Жанубий Африка Республикасига ташрифи чоғида маълум қилди.

“Биз коронавирус қандай ривожланишини ва қандай мутацияга учраганини кўрдик. Биз биламизки, COVID-19 нинг янги, кўплаб вариантлари хавотирга сабаб бўладиган янги турлари пайдо бўлади. Биз ҳалига пандемиянинг охирига етганимиз йўқ”, дейди ЖССТ вакили.

Байден Россиянинг Украинага “бостириб кириш” санасини аниқ айтди

АҚШ Президенти Жо Байден Ғарб давлатлари, Европа Иттифоқи ва НАТО етакчилари билан ўтказилган видеоконференцияда Россия Украинага жорий йилнинг 16 февраль куни “бостириб киришини” айтди, бироқ европаликлар унинг фикрига қўшилмади. Бу ҳақда “Politico” газетаси хабардор манбаларга таяниб ёзган.  

“Президент Жо Байден бир соатлик суҳбат чоғида Ғарб етакчиларига 16 февраль санасини айтди”, дейилган хабарда. 

“Арқадағ” Президентликдан кетишга қарор қилди

Туркманистон Президенти Гурбангули Бердимуҳамедов ўз лавозимини тарк этиши мумкин. У кеча, 11 февраль куни Ашхободда Туркманистон парламентининг юқори палатасининг навбатдан ташқари йиғилишида эндиликда Халқ маслаҳати раиси сифатида сиёсий тажрибасини мамлакат тараққиётига сарфлаш ниятида эканини айтди. Бу ҳақда Туркманистон давлат ахборот агентлиги хабар берди.

“Мамлакатимиз тараққиётининг янги босқичида давлат бошқаруви сари йўлни маънавий муҳитда ва замоннинг юксак талаблари асосида тарбияланган ёш етакчиларга бериш керак, деган фикрни қўллаб-қувватлайман. Мен Халқ маслаҳати раиси сифатида катта ҳаётий ва сиёсий тажрибамни бундан буён ҳам шу соҳага йўналтириш ниятидаман”, деди Гурбангули Бердимуҳаммедов.

АҚШ Хитой ва Россия ҳамкорлигидан хавотирда

Вашингтон Москва ва Пекин энг юқори даражада ҳамкорлик қилаётганидан хавотир билдирди. Бу ҳақда “Reuters” агентлиги хабар берди.  

“[Улар] бизга зарар етказиш учун ҳаракат қилмоқда”, деган АҚШ маъмурияти расмийси журналистларга. 

Америка расмийсига кўра, гап Россия ва Хитой ўртасидаги яқинлашиш кучайиб бораётгани ҳақида кетмоқда ҳамда икки давлат раҳбарлари Владимир Путин ва Си Цзиньпиннинг яқинда бўлиб ўтган учрашуви Пекин Москванинг Киевга қарши ҳаракатларини қонуний деб билишидан далолат беради. 

“Қонли январь” фожиасида жамоасини ташлаб қочган “Турк ҳаво йўллари” раиси лавозимидан “учди”

“Турк ҳаво йўллари” авиакомпанияси бошқарув кенгаши раиси Илкар Айчи “қонли январь” воқеалари содир бўлаётган вақтда экапаж аъзоларини Олмаотада қолдириб, ўзи турмуш ўртоғи билан Қозоғистонни юк самолётида тарк этгани учун лавозимидан озод этилди. Бу ҳақда маҳаллий нашрлар хабар бермоқда. 

Бир вақтлар Президент Ражаб Тойиб Эрдўғаннинг маслаҳатчиси лавозимида ишлаган Илкар Айчи январь ойи бошида таътилни ўтказиш учун Қозоғистонга борган. Мамлакатда намойишлар авж олиб, қалтис вазият юзага келгач, у рафиқаси Тугче Саатман-Айчи билан юк ташувчи самолётда Туркияга қайтиб келган. 

АҚШ ортидан яна 5 давлат ўз фуқароларини Украинадан кетишга чақирди 

Буюк Британия, Нидерландия, Черногория, Япония ва Жанубий Корея ўз фуқароларига Украинага саёҳат қилмаслик ёки унинг ҳудудини тарк этишни тавсия қилди. Бу ҳақда РБК хабар берган. 

Таъкидланишича, Черногория Ташқи ишлар вазирлиги “кучланишнинг ортиши ва олдиндан айтиб бўлмайдиган хавфсизлик вазияти муносабати билан” фуқароларга Украинани вақтинча тарк этишни тавсия қилган. Жанубий Корея Украинага қизил огоҳлантириш даражасини белгилаган ва бу давлатга саёҳат қилишни тақиқлаган. 

Песков Путин НАТО бобида 15 йил олдин тўғри башорат қилганини эслатди

Россия Президенти Владимир Путин 15 йил аввал Мюнхен хавфсизлик конференциясида НАТОни Россия чегараларига яқинлашиши масаласини кўтарган ва ҳозиргача унга жавоб берилмаган. Бу ҳақда Кремль расмий вакили Дмитрий Песков маълум қилди.

“Путин нима учун НАТО ўзининг ҳарбий инфратузилмаси билан чегарамизга яқинлашаётганини сўраган. Бу масала, кўриб турганингиздек, бугунги кунда ташқи сиёсат кун тартибининг биринчи ўрнида турибди. Ва ҳозирча бу саволга ҳеч ким жавоб бермади ”, деди у.

Поезд тагида қолиб кетган 6 яшар бола вафот этди

Кеча, 11 февраль куни Россиянинг Санкт-Петербург шаҳри шимолида олти ёшли бола электр поезди остида қолиб кетди. Бола олган жароҳатлари туфайли вафот этди. Бу ҳақда Ички ишлар вазирлигининг Шимолий-Ғарбий федерал округ бўйича транспорт бўлими маълум қилган.

“Фожиа соат 18:00 атрофида Лахта-Новая қишлоғида содир бўлган. Воқеа жойига етиб келган шифокорлар болага ёрдам беришга улгурмаган, у вафот этган”, дейилади хабарда.

Ўзбекистондан Россияга кетаётган юк машина Қозоғистонда ёниб кетди

Қозоғистонда Нур-Султон - Павлодар йўлида Россияга ўзбек трикотаж буюмларини олиб кетаётган юк машинаси ёниб кетди. Бу ҳақда КазТАГ маълум қилди.

Қайд этилишича, бугун, 12 февраль куни соат 01:38 да Ўзбекистондан Россияга трикотаж махсулотлари олиб кетаётган Renault Premium 2010 юк машинаси Нурсултон-Павлодар трассасасида ёниб кетган.

Юк машинаси Ўзбекистондан Россияга кетаётган бўлган. Икки ҳайдовчи Қалқаман қишлоғидаги иссиқлик пунктига эвакуация қилинган. Қурбонлар ва жароҳатланганлар йўқ.

“Арқадағ”нинг даври мутлақ тугайдими? Туркманистонда сайлов бўлиши кутиляпти

Туркманистон Президенти Гурбангули Бердимуҳамедов Марказий сайлов комиссиясига навбатдан ташқари президентлик сайловларини ўтказишга тайёргарлик кўришни бошлашни буюрди.

“Муддатидан ташқари президентлик сайловларига тайёргарлик кўриш бўйича ишларни олиб боринг”, деган республика МСК вакили Президент Бердимуҳамедов Туркманистон МСК раиси Гулмурод Муродовга қандай топшириқ бергани ҳақидаги саволга жавоб берар экан.

Москвада Ўзбекистон элчихона ва консуллиги “миналангани” текширилмоқда

Москва полицияси Тожикистон, Ўзбекистон ва АҚШ элчихоналари ва консулликларини “миналаш” ҳақидаги фактларни текширмоқда. Бу ҳақда ҳуқуқ-тартибот идораларида маълум қилган.

“Федерал хавфсизлик хизматига кеча, 11 февраль куни электрон почта орқали бир эркакдан унинг 44 ёшли шериги Тожикистон, Ўзбекистон ва АҚШ  элчихонаси ва бош консуллиги бўлимига портловчи моддалар солинган рюкзакларни қўйиб кетгани ҳақида иккита хат жўнатган”, дейди манба.

Россия Украинага қачон ҳужум қилишини айтган Байден Путин билан гаплашиб олмоқчи

Россиянинг Украинага ҳужум қилиш санасини аниқ айтган АҚШ Президенти Жозеф Байден бугун, 12 февраль куни Прездиент Путин билан телефон орқали мулоқот қилишни режалаштирган. Бу ҳақда Оқ уйга яқин манбага таяниб, CNN ахборот агентлиги хабар бермоқда.

Билдирилишича, мулоқот Россия-Украина ўртасидаги зиддият ортиб бораётгани сабабли ўтказилмоқда. Бундан бироз аввал АҚШ Президенти Жо Байден Ғарб давлатлари, Европа Иттифоқи ва НАТО етакчилари билан ўтказилган видеоконференция чоғида Россия Украинага жорий йилнинг 16 февраль куни “бостириб киришини” айган эди. 

Россияда ўзбекистонлик ишчининг бошига 15-қаватдан ғишт тушиб, вафот этди

Россиянинг Санкт-Петербург вилояти Пушкин туманида ўзбекистонлик ишчининг бошига 15-қаватдан ғишт тушиб кетди. Оқибатда эркак воқеа жойида халок булган. Бу ҳақда “78.ru” хабар берди.

Қайд этилишича, воқеа кеча, 11 февраль куни соат тахминан 11:00 да Школная кўчасидаги қурилиш объектида содир бўлган. Қурилиш материалларини кўтариб кетаётган 44 ёшли Ўзбекистон фуқаросининг бошига 15 қаватдан ғишт тушиб кетган. Эркак олган тан жароҳатлари туфайли воқеа жойида вафот этган. 

Истанбулда йирик ёнғин. Қурбонлар орасида Ўзбекистон фуқароси борми?

Туркиянинг Истанбул шаҳрида ўзбекистонлик мигрантлар истиқомат қиладиган ҳудудларидан бири Гунгўран туманидаги Синанпаша кўчасида 5 қаватли бино ёниб кетди. Ёнғин оқибатида қурбон бўлганлар сони ортиб бормоқда. 

Ёнғин кеча, 11 февраль куни соат 14:00 атрофида содир бўлган. Унда 4 нафар чет эл фуқароси ҳалок бўлган, 6 киши тутундан заҳарланиб, шифохонага етказилган. 

Қайд этилишича, қурбонлар ёнғиндан қочиб ўзини ҳожатхонага қулфлаган ва ўша ерда тутундан заҳарланиб, вафот этган.

Собиқ Президентнинг қудаси порахўрликда айбланиб, қамалди

Қирғизистоннинг собиқ Президенти Сооронбай Жээнбековнинг қудаси, парламентнинг собиқ депутати Алиярбек Абжалиев ҳибсга олинди. Бу ҳақда 24.kg нашри хабар берди. 

Қайд этилишича, собиқ халқ депутати фирибгарликда гумонланиб, қўлга олинган.

Маълум қилинишича, Миллий хавфсизлик давлат қўмитаси собиқ депутатнинг ҳибсга олингани ҳақидаги маълумотни тасдиқлаган. Бироқ тергов сирлари яширилиб, гумонланувчининг исми кўрсатилмаган.