Покистон 7 июлни Қуръон таҳқирланишига қарши норозилик куни деб эълон қилди

Покистон Вазирлар Маҳкамаси яқинлашиб келаётган жумани (7 июль) Швецияда мусулмонлар учун муқаддас Қуръони каримнинг таҳқирланишига қарши норозилик куни деб эълон қилди. Бу ҳақда бугун, 5 июль куни “Daily Pakistan” газетаси хабар берди. 

Қайд этилишича, 7 июль куни бутун мамлакат бўйлаб исломофобияни қораловчи акциялар ўтказилади. Покистон ҳукумати раҳбари Шаҳбоз Шариф барча сиёсий партияларни уларда иштирок этишга чақирди.  

“Тинчлик ва бирликда яшаш тарафдори бўлган барча давлатлар ва уларнинг раҳбарлари исломофобия ва хурофотдан чекланиши керак. Дин, эътиқод ва маънавий мафкураларга қарши қаратилган ғоялар дунё тинчлигининг душманидир”, деган Бош вазир Ҳукумат йиғилишида. 

Шарифнинг айтишича, эртага, 6 июль куни Покистон парламентининг юқори ва қуйи палаталари Швецияда Қуръоннинг таҳқирланиши билан боғлиқ миллий стратегияни ишлаб чиқиш учун қўшма йиғилиш ўтказади. 

Аввалроқ БМТ Инсон ҳуқуқлари кенгаши Исломобод илтимосига кўра келаси ҳафтада исломофобия ва диний адоватга қарши курашиш бўйича шошилинч йиғилиш ўтказилишини эълон қилган эди. 

Эслатиб ўтамиз, жорий йилнинг 28 июнь куни Швеция пойтахти Стокгольмнинг марказий майдонларидан бирида 37 ёшли ироқлик муҳожир томонидан Қуръон китоби ёқиб юборилганди. Бунга нисбатан бир қатор давлатлар ва халқаро ташкилотлар норозилигини билдирди. Жумладан, Россия Президенти Владимир Путин Қуръоннинг ёқилиши динлараро адоват қўзғашини айтиб, бу ҳолат жиноят дея баҳоланишини ҳамда унга йўл қўйиб бўлмаслигини таъкидлаган эди. Шунингдек, Путинга унинг Доғистонга сафари давомида Қуръон совға қилишганди. 

Расмий Анқара ҳам Қуръоннинг ёқилиши юзасидан Швецияга нисбатан норозилигини билдириб, ушбу мамлакат учун НАТОга аъзо бўлиш “орзу” бўлиб қолишини маълум қилганди. 

Европа Иттифоқи Швециядаги воқеалар бўйича ўз позициясини билдириб, муқаддас китобларнинг ёқилиши ҳақорат, ҳурматсизлик ва очиқ-ойдин провокация эканини билдирган. Шунингдек, Қуръонни ёқиш бўйича акция Иттифоқ фикрини акс эттирмаслиги маълум қилган. 

АҚШ ҳам Қуръоннинг ёқилишини қоралаб, Швециядаги мусулмонларнинг ҳуқуқларидан хавотирда эканини билдирган. 

Ироқ Қуръонни ёққан одам унинг фуқароси эканини даъво қилиб, Швециядан уни экстрадиция қилишни талаб этганди. Ироқда, шунингдек, футбол бўйча миллий чемпионатнинг “Ал-Шорта” ва “Ал-Қосим” жамоалари ўртасидаги ўйинда Швецияда Қуръоннинг ёқилишига қарши акция ўлароқ футболчи ва ҳакамлар майдонга Қуръон китоблари билан чиқишди.

2 июль куни эса Ислом ҳамкорлик ташкилотида Швецияда Қуръоннинг ёқилиши юзасидан навбатдан ташқари йиғилиш ўтказилганди.

3 июль куни Рим папаси Франциск Швецияда Қуръон ёқилишини кескин қоралаб, бу ҳолат уни ғазаблантирганини маълум қилди.

Бугун, 5 июль куни эса Ўзбекистон Президенти Шавкат Мирзиёев ҳам Қуръоннинг ёқилишини қоралади.