Borrel G‘arbning xatolarini sanadi 

G‘arb Ukrainaga NATOga a’zo bo‘lishini va’da berib, xatoga yo‘l qo‘ydi. Bu haqda Yevropa Ittifoqining Tashqi ishlar va xavfsizlik siyosati bo‘yicha oliy vakili Jozep Borrel ta’kidlagan. 

“Biz yaxshiroq ishlashimiz mumkin bo‘lgan lahzalar bor. Masalan, biz kafolat bera olmaydigan narsamiz, xususan, Ukrainaning NATOga kirishini taklif qildik. Bu amalga oshirilmadi. Menimcha, amalga oshirishimiz mumkin bo‘lmagan va’dalarni berish xato bo‘ldi”, degan u. 

Bundan tashqari, Yevropa diplomatiyasi rahbari G‘arb Rossiya bilan munosabatlarni qurishda xatoga yo‘l qo‘yganini tan olgan. 

“Shunday qilib, biz Rossiyani G‘arb bilan yaqinlashtirish imkoniyatidan mahrum bo‘ldik”, degan Borrel.

Eslatib o‘tamiz, joriy yilning 1 mart kuni Ukraina YeIga a’zo bo‘lish uchun ariza bergandi. Ukrainadan keyin xuddi shunday arizalar Gruziya va Moldova tomonidan topshirilgan. 

11 mart kuni Versal (Fransiya)da Ukrainadagi vaziyat muhokamasidan so‘ng, Yevropa Ittifoqi davlat va hukumat rahbarlari birdamlik va bu mamlakatni qo‘llab-quvvatlashlarini bildirdilar. Biroq alyansga a’zo bo‘lish uchun nomzod maqomini berish bo‘yicha qaror qabul qilinmadi.  

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.