QALAMPIR.UZ axborot-tahliliy internet-nashr

Biror xonadon yo‘qki, qalampir kirib bormagan, biror uyning peshtoqi yo‘qki, qalampir osib qo‘yilmagan bo‘lsa. Xalqimiz qalampirni sevib iste’mol qiladi. Ishonamizki, QALAMPIR.UZ axborot-tahliliy internet-nashrini ham sevib o‘qib boradi. Bunga 3 yillik faoliyatimiz davomida kun sayin amin bo‘lib boryapmiz. Qalampir odamlarning kundalik ehtiyojiga aylanib ulgurgan bo‘lsa, ne ajab.

Mazkur loyiha 2015 yilning yanvar oyidan o‘z ishini boshlagan bo‘lib, uning asosiy maqsadi O‘zbekiston OAV sohasida yangilikka qo‘l urish, xolis, shaffof axborot maydonini yaratish, hech kim so‘z ochmagan, aytishga jur’at topilmagan mavzularni qalamga olib, odamlarning muammolarini hal etish, jamiyatni faqat buguni bilan yashash emas, balki ertasi, uzoq kelajakni oldindan ko‘rib, shunga yarasha intilishga undashdan iborat.

Bizning asosiy qadriyatlarimiz

Inson – eng ulugʻ mavjudot.

Islohotlar – islohot uchun emas, islohotlar – inson va uning manfaatlari uchun, degan shior atrofida oʻz faoliyatimizni qurganmiz. Odamlar hayotida boʻlayotgan har bir voqelik biz uchun qiziq va muhim.

It odamni emas, odam itni tishlagani yangilik.

QALAMPIR.UZʼning doimiy kuzatuvchilari yaxshi bilganidek, biz hamma gapirayotgan mavzular haqida boshqalar qatori soʻz aytishni istamaymiz. Farqlanmasak, eʼlon qilinayotgan xabar, yangilik, maqola, intervyu va tahlillarning biroz qalampiri boʻlmasa, boshqalar qatoriga qoʻshilib qolamiz.

Qalampirda sabrini sinovda toblaganlar, mehnatdan qochmaydiganlargina ishlaydi.

Bugun Oʻzbekistondagi koʻplab internet-nashrlarda bir vaqtlar faoliyatini QALAMPIR.UZʻda boshlab, tajriba orttirgan muxbirlar ishlayapti va biz bundan quvonamiz. QALAMPIR.UZ allaqachon internet-nashrlar orasida maktab maqomini olib boʻlgan.