Россия Финляндия дипломатларини мамлакатдан қувмоқчи. Хельсинкининг жавоби қандай?

Россия ҳукумати 2023 йил 1 октябрдан Финляндиянинг Санкт-Петербургдаги бош консуллиги фаолиятига розилигини қайтариб олади ва тўққиз нафар Финляндия дипломатини мамлакатдан чиқариб юборади. Бу ҳақда Финляндиянинг Москвадаги элчиси Антти Хелантернинг чақируви муносабати билан бугун, 6 июль куни Россия Ташқи ишлар вазирлиги тарқатган баёнотда айтилди.

“Финляндия расмийларининг қарама-қарши ҳаракатларига жавобан Россия томони 1 октябрдан Финляндиянинг Санкт-Петербургдаги Бош консуллиги фаолиятига розилигини қайтариб олишга қарор қилди”, дейилади хабарда.

Россия ТИВ маълумотларига кўра, Антти Хелантерга 2023 йил июнь ойида Россиянинг тўққиз нафар хорижий ваколатхоналари вакилининг Финляндиядан чиқариб юборилиши муносабати билан Финляндиянинг Россиядаги элчихонаси ва Санкт-Петербургдаги Бош консуллигининг тўққиз нафар ходими персона нон грата деб эълон қилингани ҳақида маълум қилинган.

“Финляндиянинг НАТОга кириши Россия Федерацияси хавфсизлигига таҳдид туғдириши, Киевни урушга киришишга ундаши ва уни Ғарб қуроллари билан таъминлаши Россияга қарши аниқ душманона ҳаракатларни англатади. Финляндия ҳукуматининг бундай йўналиши жавобсиз қолиши мумкин эмас”, дейилади ТИВ баёнотида.

Шундан сўнг, Финляндия Президенти Саули Ниинистё бунга жавобан Туркудаги Россия консуллиги ёпилишини айтган. 

"Биз жавоб чораларини тайёрлаяпмиз. Санкт-Петербург Бош консуллигининг ёпилишига тенг жавоб Россиянинг Туркудаги консуллигининг ёпилишидир", деб ёзган у Twitter’даги саҳифасида.

Эслатиб ўтамиз, олдинроқ Германия Россиядаги ваколатхоналарида ишлайдиган 100 дан ортиқ ходимни ишдан бўшатишини маълум қилган эди. Март ойи охирида Германия 30 дан ортиқ россиялик дипломатни персона нон грата деб эълон қилди. Май ойи бошида Германия миссияларининг бир гуруҳ ходимлари Россияни тарк этди. Май ойи охирида эса Берлин Россиянинг Германиядаги бешта бош консуллигидан тўрттасининг фаолиятига берилган рухсатномани бекор қилишга қарор қилди. Шунингдек, Норвегия Россиянинг 15 дипломатини персона нон грата деб эълон қилиши ортидан Россия ҳам Норвегиянинг ўн нафар дипломатини персона нон грата деб эълон қилди. Швеция билан бўлган шу каби ҳолатда эса ҳар икки тарафдан 5 нафардан дипломатлар мамлакатлардан “ҳайдаб” чиқарилди. Айнан шу каби ҳолатлар Австрия, Молдава, Хорватия, Эстония, Болгария ва Литва билан ҳам кузатилган.