Эрон қўшнилардан узр сўради — бу уруш йўналишини ўзгартирадими?

Эрон Президенти Масъуд Пезешкиён қўшни давлатларга берилган зарбалар учун узр сўрагани халқаро кузатувчилар эътиборини тортди. Давлатлар ўртасида, айниқса уруш даврида, бундай тўғридан-тўғри узр сўраш жуда кам учрайди. Шунинг учун унинг баёноти сиёсий сигнал сифатида баҳоланмоқда.

Пезешкиён ўз чиқишида Эрон қўшни давлатларга ҳужум қилиш ниятида эмаслигини таъкидлаб, қарши зарбалар берилмаса, бу ҳолат такрорланмаслигини эълон қилди. Бу баёнот орқали Теҳрон минтақадаги можарони янада кенгайишидан сақланишга ҳаракат қилаётгани тахмин қилинмоқда.

Мутахассислар фикрича, мазкур қадамнинг яна бир сабаби — Эроннинг минтақадаги сиёсий яккалигини кучайтирмасликдир. Айрим қўшни давлатлар АҚШ ҳарбий базалари жойлашган ҳудудга эга бўлса-да, уларни тўғридан-тўғри нишонга олиш Теҳронни янада изоляция қилиб қўйиши мумкин.

Бироқ узр баёноти амалий сиёсатга айланадими ёки йўқми — бу ҳали ноаниқ. Қатар ва Бирлашган Араб Амирликлари кейинчалик ҳам ўз ҳудудига қарата учирилган ракеталар ва дронлар ҳужуми тўхтатилмаганини маълум қилган. Бу эса Эрон раҳбарияти ичида қарор қабул қилиш тизими қанчалик барқарор экани ҳақида саволларни кучайтирди.

Олий раҳбар Али Хоманаий ҳалок бўлганидан кейин мамлакатда қарорлар вақтинчалик раҳбарият кенгаши томонидан қабул қилинмоқда. Бундай шароитда Президентнинг барча ҳарбий тузилмалар, айниқса Ислом инқилоби қўриқчилари корпуси устидан қанчалик таъсирга эга экани аниқ эмас.

Эрон ичида ҳам бу баёнот турлича баҳоланмоқда. Қаттиқ позициядаги айрим сиёсий доиралар Пезешкиённинг узр сўрашини заифлик сифатида қабул қилган. АҚШ Президенти Дональд Трамп эса буни Теҳрон босим остида қолганининг белгиси сифатида талқин қилган.

Таҳлилчиларга кўра, ушбу ҳолат бир неча мақсадни кўзлаши мумкин: минтақадаги вазиятни юмшатиш, Теҳронга вақт ютиш ёки мамлакат ичидаги сиёсий курашда ўз позициясини мустаҳкамлаш. Қайси бири устун экани эса яқин кунлардаги воқеаларда намоён бўлади.