Rossiya Zaporojeni qo‘shib olishi uchun ilk rasmiy qadam tashlandi

Ukrainaning Rossiya tomonidan egallangan Zaporoje viloyatining rasmiy Moskva tomonidan tayinlangan rahbari Yevgeniy Balitskiy mintaqaning Rossiya tarkibiga qo‘shilishi masalasi bo‘yicha referendum o‘tkazish to‘g‘risidagi buyruqni imzolaganini ma’lum qildi.

“Men Markaziy saylov komissiyasining Zaporoje viloyatini Rossiya Federatsiyasiga birlashtirish bo‘yicha referendum o‘tkazishga tayyorgarlik ko‘rishni boshlash haqidagi buyruqni imzolayapman”, deydi u “Biz Rossiya bilanmiz” forumida.

Forumda referendum to‘g‘risidagi rezolyutsiyani Zaporoje viloyati harbiy-fuqarolik ma’muriyati (HFM) bosh kengashi a’zosi Vladimir Rogov o‘qib eshittirgan.

“Biz, forum ishtirokchilari, kelajagimizni Rossiya bilan bog‘layotganimizni e’lon qilamiz. Tarixiy adolatni tiklash vaqti keldi”, degan Rogov.

U Zaporoje viloyati Rossiyaning bir qismi sifatida har qanday tajovuzdan himoyalanishiga ishonch bildirgan.

“Erkin tanlov tamoyilidan kelib chiqib, mintaqamizning har bir fuqarosining fikrini asosiy qadriyat deb bilgan holda, biz Zaporoje viloyatining Rossiya Federatsiyasi tarkibiga to‘la huquqli sub’ekt sifatida kirishi bo‘yicha referendum o‘tkazish niyatimiz borligini e’lon qilamiz”, deya u rezolyutsiya matnini keltirgan.

Avvalroq Ukrainaning Rossiya tomonidan egallangan Xerson va Zaporoje viloyatlarini o‘z tarkibiga birdan qo‘shib olishga urinishi mumkinligi haqida xabar bergan edik.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.