Nazarboyev va To‘qayev o‘rtasida keskin muzokara ketmoqda – “The Guardian”
Olam
−
17 yanvar 2022 26078
Qozog‘istonning Birinchi Prezidenti Nursulton Nazarboyev amaldagi davlat rahbari Qosim-Jomart To‘qayev bilan mamlakatdagi aktivlar, daromadlar va tog‘-kon sanoatini qayta taqsimlash bo‘yicha “qattiq muzokaralar” olib bormoqda. Bu haqda Britaniyaning “The Guardian” gazetasi o‘z manbalariga tayanib xabar bermoqda.
“Qozog‘istonda hokimiyat uchun kurash davom etmoqda. Hamma narsa muammosiz tugashiga kafolat yo‘q”, deydi suhbatdoshlardan biri nashrga.
Yana bir manba “Nazarboyev davri tugadi”, deb ta’kidlaydi. Bunga uning yaqinlari asosiy lavozimlardan chetlatilayotgani dalolat beradi.
Britaniya gazetasi suhbatdoshlari mamlakatda bo‘lib o‘tgan norozilik namoyishlari va tartibsizliklarda “Nazarboyevlar klanidan reaktiv va konservativ kuchlar”ni ayblamoqda.
Shuningdek, Qozog‘istonning siyosiy elitasi qayta tashkil etilgan va hozir To‘qayevga sodiq ekani, ammo u ham repressiyalardan foydalangani aytiladi. Ayni paytda Nazarboyevning qayerda ekanligi hamon noma’lum.
Oxirgi kunlarda Birinchi Prezident Nursulton Nazarboyev va uning oila a’zolari atrofidagi gap-so‘zlar soat sayin ortdi. Bunga hamohang tarzda oxirgi mashmashalar fonida Nazarboyev va oilasi munosabat bildirmadi. Olma-otada esa uning sobiq qarorgohiga o‘t qo‘yildi, haykali ag‘darildi. Murakkab vaziyat biroz tin olgach Nazarboyev yana paydo bo‘ldi. To‘g‘rirog‘i, uning matbuot kotibi Nazarboyevning Nur-Sultondaligini aytib, Elboshi nomidan xalqni Prezident To‘qayev atrofida birlashishga chaqirdi.
So‘nggi ma’lumotlarga ko‘ra, Nazarboyev ayni vaqtda BAAda qolmoqda. Elboshining ko‘rinmay qolishi ortidan Rossiya Liberal-demokratik partiyasi raisi Vladimir Jirinovskiy Nazarboyev allaqachon vafot etgan va uni ko‘mib yuborishgan degan taxminni ilgari surgandi.
Avvalroq, Qozog‘iston sobiq Prezidentining kenja qizi Aliya Nazarboyeva Instagram ijtimoiy tarmog‘idagi akkaunti orqali BAAda ekani aniqlangandi. Biroq bundan ko‘p o‘tmay, uning ijtimoiy tarmoqlardagi sahifalari o‘chirib tashlangandi.
Ma’lumot uchun, 2019 yil mart oyida Prezident lavozimini Qosim-Jomart To‘qayevga topshirib, Elboshi rutbasini olgan va Xavfsizlik Kengashini boshqarib kelayotgan Nursulton Nazarboyev Qozog‘istondagi namoyishlar avj olishi fonida Xavfsizlik Kengashi boshqaruvini ham qo‘sh qo‘llab Prezident To‘qayevga topshirdi. O‘shandan buyon uning qayerdaligi shubha ostida. Garchi Nazarboyevning atrofidagilar 8 yanvardan boshlab tilga kirib, uning mamlakatda bo‘lib turganini aytayotgan bo‘lsa-da, sobiq Prezident hozirgacha hech yerda ko‘rinish bermadi. Hatto, to‘ng‘ich qizi – deputat Darig‘a Nazarboyeva ham 11-12 yanvar kunlari bo‘lib o‘tgan Parlament yalpi majlisida ishtirok etmagan. Uning koronavirusga chalingani va kasallik sabab ta’tilda ekani aytildi.
Nazarboyev ko‘rinish bermayotgan bir vaqtda esa uning hatto, sog‘lig‘i haqida mish-mishlar tarqala boshladi. Namoyishlarda esa sobiq Prezidentning Olma-otadagi saroyi yoqib yuborildi, haykali qo‘porib tashlandi.
Avvalroq, Nazarboyevning kuyovlari: Aliyaning (kenja qizi) turmush o‘rtog‘i Dimash Dosanov “Kaztransoyl” AJ rahbarigidan, Darig‘aning (to‘ng‘ich qizi) turmush o‘rtog‘i Kayrat Sharipbayev “QazaqGaz” milliy kompaniyasi AJ rahbarligidan ketgandi. Bugun, 17 yanvar kuni o‘rtancha qiz Dinaraning turmush o‘rtog‘i Timur Kulibayev “Atameken” milliy tadbirkorlar palatasi prezidiumi raisi lavozimini tark etdi.
Eslatib o‘tamiz, Qozog‘istonning sobiq Prezidenti Nursulton Nazarboyevning uzoq yillik hamkori, mamalakat Milliy xavfsizlik qo‘mitasi (MXQ) sobiq raisi Karim Masimov davlatga xiyonat qilish fakti bo‘yicha hibsga olindi. Karim Masimovdan tashqari, MXQ raisining sobiq o‘rinbosari – “A”, Maxsus maqsadli xizmat bo‘limi boshlig‘i A.Sadiqulov va MXQ raisi o‘rinbosari D.Yergojinlar ham qo‘lga olingan.
17 yavanr kuni Prezident Qosim-Jomart To‘qayev Elboshining jiyani – Milliy xavfsizlik qo‘mitasi raisining birinchi o‘rinbosari Samat Abishni lavozimidan ozod etish haqidagi hujjatni imzoladi.
Live
Barchasi
