“Inqiroz qo‘zg‘atilyapti”. Zaxarova Ukraina AQSHga qurol evaziga nima berayotganini aytdi

Vashingtonning o‘zi Ukrainani g‘alla zaxiralaridan mahrum qilib, mamlakat hududida oziq-ovqat inqirozini keltirib chiqarmoqda. Bu haqda Rossiya Tashqi ishlar vazirligi rasmiy vakili Mariya Zaxarova aytib o‘tgan. 

“AQSH Prezidenti Jo Baydenning joriy yilning 10 may kuni Ukrainadan 20 million tonna g‘alla eksport qilish imkoniyatlarini izlash zarurligi haqidagi bayonoti Kiyevning Lend-lizing qonuni imzolanishi bilan bir vaqtga to‘g‘ri keldi. Ma’lum bo‘lishicha, Kiyev qurol-yarog‘ uchun bug‘doy bilan to‘laydi. Aslida, amerikaliklarning o‘zlari Ukrainani g‘alla zaxiralaridan mahrum qilib, mamlakatda oziq-ovqat inqirozini qo‘zg‘atmoqdalar”, deydi Zaxarova.

Uning so‘zlariga ko‘ra, AQSH va Yevropa Ittifoqi Afrika hamda Yaqin Sharq mamlakatlariga oziq-ovqat inqirozining oldini olish maqsadida  ekanini aytib, 2,5 oy ichida Ukrainadan 20 million tonna donni eksport qilish niyatida.

“Ammo, haqiqatda g‘alla Yevropadagi omborlarga tashiladi. Uni Germaniya, Polsha, Litva, Ruminiya va Bolgariyadagi manzillarga yetkazish uchun temir yo‘l, avtomobil va daryo yo‘llari tashkil etilgan”, deya qo‘shimcha qilgan TIV vakili.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.