Alina Kabayeva yana bir mamlakatda “zapret”ga tushdi

Kanada hukumati Rossiya Federatsiyasiga nisbatan sanksiyalar ro‘yxatiga yana to‘rt kompaniya va 22 nafar jismoniy shaxsni qo‘shdi. Bu haqda bugun, 31 may Kanada hukumati saytida ma’lum qilindi. 

Xususan, Olimpiada chempioni Alina Kabayeva, Rosselxozbank va Investtorgbank sanksiyalar ro‘yxatiga qo‘shilgan. 

Sanksiyalar ro‘yxatiga kirish Kanadadagi mumkin bo‘lgan aktivlarni muzlatish va mamlakatga kirishni taqiqlashni anglatadi. 

Avvalroq, Kanada Tashqi ishlar vazirligi bayonotida, 2022 yil 24 fevraldan beri Ukrainada davom etayotgan vaziyat munosabati bilan Ottava Rossiya Federatsiyasi, Belarus va Ukrainaning mingdan ortiq jismoniy va yuridik shaxslarini sanksiyalar ro‘yxatiga qo‘shgani ta’kidlangan edi. 

Tashqi siyosat idorasi rahbari Melani Joli bir necha bor ta’kidlaganidek, Kanada Ukrainadagi vaziyat tufayli Moskvaga qarshi sanksiyalar siyosatini davom ettirish niyatida. 

Ma’lumot o‘rnida, gimnastikachi Alina Kabayeva Rossiya Federatsiyasi Prezidenti Vladimir Putin bilan ishqiy munosabatda bo‘lgan deb ko‘riladi. U bundan avval Yevropa Ittifoqi va Buyuk Britaniya sanksiyalari ro‘yxatiga kiritilgan edi. 

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.