“Vremya”da Rossiyaning Ukraianaga qarshi urushini qoralagan jurnalist sudlanyapti 

Kecha, 14 mart kuni Rossiyaning “Birinchi kanal”i “Vremya” ko‘rsatuvi efirida studiyaga Ukrainaga qarshi urushni to‘xtatish haqida plakat bilan kirib borgan muharrir Marina Ovsyannikovaga nisbatan sud ishi boshlandi. Bu haqda “Novaya gazeta” nashri xabar berdi. 

Qayd etilishicha, sud Marina Ovsyannikova ishini Rossiya Federatsiyasining Ma’muriy javobgarlik to‘g‘risidagi kodeksining 20.2 moddasi 2-qismi (tasdiqlanmagan ommaviy tadbirni tashkil etish) bilan ko‘rib chiqmoqda.

Bundan avvalroq esa, TASS davlat axborot agentligi Marina Ovsyannikovaga nisbatan rossiyalik harbiylar haqidagi “yolg‘on ma’lumotni ommaga tarqatish” bo‘yicha modda bilan tergovoldi tekshiruvlar boshlanganini ma’lum qilgandi. 

Eslatib o‘tamiz, kecha, 14 mart kuni kechqurun “Birinchi kanal” xodimi Marina Ovsyannikova jonli efirda urushga qarshi plakat bilan studiyaga kirib bordi. Yangiliklar e’loni paytida u “No war. Urushni to‘xtating. Propagandaga ishonmang. Bu yerda sizni aldashmoqda. Ruslar urushga qarshi”, deb yozilgan plakat bilan kadrga tushdi. Ovsyannikova rejissyorlar boshqa kadrni qo‘yib yubormaguncha efirda bir necha bor “Urushni to‘xtating! Urush kerakmas!”, deb takrorlagan. 

Muharrir Moskvaning Ostankino tumani politsiya bo‘limiga olib ketilgani xabar qilingan. Biroq politsiya advokatlarga uning bo‘limda yo‘qligini aytgan.

Ukraina Prezidenti Vladimir Zelenskiy yangi videomurojaatida Ovsyannikovaga shaxsan minnatdorlik bildirdi.

“Haqiqatni yetkazishga harakat qilishdan to‘xtamagan ruslardan minnatdorman. Dezinformatsiyaga qarshi kurashayotgan va haqiqatni do‘stlari, qarindoshlari va yaqinlariga aytayotganlardan. Shuningdek, shaxsan urushga qarshi plakat bilan “Birinchi kanal” studiyasiga kirgan qizdan. Norozilik bildirishdan qo‘rqmaydiganlardan. Sizning mamlakatingiz butun dunyodan yopilib, juda katta Shimoliy Koreyaga aylanmaguncha, kurashishingiz kerak. Imkoniyatingizni qo‘ldan boy bermasligingiz kerak”, degan Zelenskiy.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.