Ukrainadagi urush Moskva rejalashtirganidek kechmayapti – NATO

NATO bosh kotibi Yens Stoltenberg Rossiyaning Ukrainadagi harbiy amaliyoti “muvaffaqiyatsiz” va “to‘xtab qolgan”, shu sababli Ukraina ushbu konfliktda g‘alaba qozonishi mumkinligini ma’lum qildi. Uning fikricha, rus qo‘shinlari Kiyevni olmoqchi bo‘lgan, ammo buning uddasidan chiqa olmagan va hozirda chekinmoqda. Shuningdek, u NATO va alyans ittifoqchilari Ukrainaga yordamni oshirishi kerakligini ham ta’kidladi. Bu haqda “Reuters” agentligi xabar berdi. 

“Ukraina bu urushda g‘alaba qozonishi mumkin. Ukrainaliklar o‘z vatanlarini mardlik bilan himoya qilmoqdalar”, Degan NATO bosh kotibi Berlinda o‘tkazilgan alyans Tashqi ishlar vazirlarining norasmiy uchrashuvi yakunlari bo‘yicha jurnalistlarga videomuloqot orqali. U koronavirus infeksiyasiga chalingani tufayli shaxsan ishtirok eta olmagan.

NATO Bosh kotibiga ko‘ra, Rossiya harbiy operatsiyasi Moskva rejalashtirganidek kechmayapti.

“Ular Kiyevni egallab ololmadilar. Xarkovdan chekinmoqdalar va ularning Donbassdagi asosiy hujumi to‘xtab qoldi”, deya uning so‘zlarini keltiradi nashr.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.

Kamronbey Kenjayev