Ukraina raketa bilan urgan yirik “Moskva” kreyseri cho‘kib ketdi

“Moskva” raketa kreyseri bo‘ron vaqti o‘z manziliga olib ketilayotganda, portlash natijasida boshlangan yong‘in tufayli korpusga yetgan zarar sabab cho‘kib ketdi. Bu haqda kecha, 14 aprel kuni Rossiya Federatsiyasi Mudofaa vazirligi xabar bergan.

“Moskva” kreyserini belgilangan portga tortib borish paytida kema yong‘in paytida krpusga yetgan zarar tufayli o‘z barqarorligini yo‘qotdi. Bo‘ronli dengiz sharoitida kema cho‘kib ketdi”, deyiladi xabarda.

Vazirlik, avval xabar qilinganidek, kreyser ekipaji hududdagi Qora dengiz floti kemalariga evakuatsiya qilinganini eslatib o‘tgan.

Eslatib o‘tamiz, kecha, 14 aprel kuni Rossiya Qora dengiz flotining “Moskva” gvardiya raketa kreyseri yong‘in sabab o‘q-dorilarning portlashi natijasida jiddiy shikastlandi. Mudofaa vazirligi kema ekipaji evakuatsiya qilingani bildirdi.

O‘z navbatida Ukraina rasmiylari “Moskva” kreyseri mamlakat harbiylari tomonidan hujumga uchraganini, unga “Neptun” qanotli raketasi bilan zarba berilganini e’lon qildi.

“Moskva” – Qora dengiz flotining flagmani. 1983 yilda “Shon-sharaf” nomi bilan foydalanishga topshirilgan. 1996 yilda kreyser hozirgi nomini olgan. Kemaning asosiy zarba quroli 16 ta P-1000 “Vulkan” raketalarini otish moslamasi hisoblanadi.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.