Ukraina million kishilik armiya to‘playapti – Mudofaa vaziri

Ukraina Prezidenti Vladimir Zelenskiy mamlakatning Rossiya tomonidan egallangan janubiy qismlarini ozod qilishga ko‘rsatma berdi. Ukraina buning uchun bir million kishilik qo‘shin to‘plashga kirishdi. Bu haqda Ukraina Mudofaa vaziri Aleksey Reznikov “The Sunday Times” nashriga bergan intervyusida aytib o‘tdi.

Vazirning ta’kidlashicha, janubiy viloyatlarda qirg‘oqbo‘yi hududlarini deokkupatsiya qilish bo‘yicha buyruq mavjud. Zelenskiy bu hududlarni birinchi navbatda harbiy yo‘l bilan qaytarib olishni buyurgan, chunki ular Ukraina iqtisodiyoti uchun muhim ahamiyatga ega.

Uning tushuntirishicha, gap faqat armiya soni haqida emas. Bu G‘arb qurollari bilan jihozlangan kuchlar bo‘lishi kerak. 

“Axir, bizning askarlarimiz o‘zlarining janubiy hududlarini Rossiya armiyasidan samarali tarzda qaytarib olishlari kerak”, degan vazir.

Boshqa hududlar bilan nima bo‘ladi?

Reznikovning so‘zlariga ko‘ra, janubiy viloyatlar ustuvorligiga qaramay, boshqa hududlar uchun kurash to‘xtamaydi. Ukraina yerlarining har kvadrat kilometri ozod qilinishi kerak.

“Endi Kremlning tashviqoti ular go‘yoki Donbassni qaytarib olmoqchi ekaniga qaratilgan. Biroq, ular Ukrainani dengizdan butunlay uzib qo‘yishni rejalashtirayotgani haqida bir necha bor ma’lumot berishdi”, deydi Mudofaa idorasi rahbari.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.