Shoygu Rossiya Ukrainadagi urushni nega sekinlashtirayotganini ochiqladi

Olam 26613
image
-

Ukrainadagi “maxsus harbiy operatsiya” paytida hujumning sekinlashishi ongli ravishda qabul qilingan qaror bo‘lib, bu tinch aholi o‘rtasidagi talafotlarni minimallashtirish istagi bilan bog‘liq. Bu haqda Rossiya Mudofaa vaziri Sergey Shoygu Toshkentda o‘tayotgan Shanxay Hamkorlik Tashkilotiga (SHHT) a’zo davlatlar Mudofaa vazirlari yig‘ilishida ma’lum qildi.

Uning so‘zlariga ko‘ra, urush davrida rossiyalik harbiylar insonparvarlik huquqi normalariga qat’iy rioya qiladi.

“Zarbalar Ukraina Qurolli kuchlarining harbiy infratuzilmasi – aerodromlar, qo‘mondonlik punktlari, mustahkamlangan hududlar, harbiy-sanoat kompleksi ob’ektlari va omborlarga yuqori aniqlikdagi qurollar yordamida amalga oshirilmoqda.

Shu bilan birga, tinch aholi orasida qurbonlar bo‘lmasligi uchun hamma narsa qilinmoqda. Albatta, bu hujum tezligini pasaytiradi, lekin biz buni ongli ravishda amalga oshiryapmiz”, deydi Shoygu.

Mudofaa vazirligi rahbari Rossiya harbiylari bosib olingan hududlarda tinch hayot o‘rnatish bo‘yicha tizimli ishlarni tashkil etganini aytgan. 

“Biz gumanitar yordam ko‘rsatmoqdamiz, infratuzilma va hayotni ta’minlash tizimlarini tiklayapmiz”, deydi u.

Shoyguning iddao qilishicha, "Ukraina harbiy tuzilmalari kuydirilgan tuproq taktikasini qo‘llab", terrorchilar kabi harakat qilmoqda va xalqaro me’yorlarni qo‘pol ravishda buzmoqda.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.

Diyora Abdurahmonova
Maqolaga baho bering
Baholaganlar: 87
Reyting: 3.1
t
×