Rossiya Yevropadan Kiyevga yetkazilgan S-300 ZRMni yo‘q qildi

Rossiya Qurolli Kuchlari Ukrainaga Yevropadan yetkazilgan S-300 zenit-raketa komplekslarining uchirish moslamalarini yo‘q qildi. RF Mudofaa vazirligi matbuot kotibi Igor Konashenkov shunday axborot tarqatdi.

“10 aprel kuni Dnepropetrovsk shahrining janubiy chekkasida “Kalibr” yuqori aniqlikdagi dengiz raketalari Yevropa davlatlaridan birining Kiyevga yetkazib berilgan S-300 zenit-raketa diviziyasining angarda yashiringan jihozlarini yo‘q qildi. Jumladan, to‘rtta S-300 raketasi va Ukraina qurolli kuchlarining 25 nafargacha xodimi ham yo‘q qilindi”, degan general-mayor.

Bundan tashqari, Uspenovka hududida S-300 havo mudofaa tizimini yoritish va boshqarish uchun radar yaroqsiz holga keltirilgan.

O‘tgan juma kuni Slovakiya Bosh vaziri Eduard Xeger Bratislava S-300 havo mudofaa tizimini Kiyevga topshirganini e’lon qilgandi. Respublika Mudofaa vaziri Yaroslav Nagining aniqlik kiritishicha, yaqin kelajakda mamlakat AQSHdan Patriot tizimining to‘rtinchi majmuasini oladi.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.