Rossiya Luganskda ham yo‘qotishlarga uchramoqda – UQK
Olam
−
02 aprel 2022
15400Rossiya Qurolli Kuchlari (RQK) bo‘linmalari Ukrainaning Lugansk viloyatidagi janglarda sezilarli yo‘qotishlarga uchramoqda. Bu haqda bugun, 2 aprel kuni Ukraina Bosh shtabi ma’lum qildi.
Ukraina Qurolli Kuchlari (UQK) Rossiya kuchlarining ayrim yo‘nalishlarda ortga chekinishi, Slobojanskiy, Donetsk va Lugansk yo‘nalishlarida hujum operatsiyalarini kuchaytirish uchun qilingan bo‘lishi mumkinligini ta’kidlagan.
Rossiya Luganskda yo‘qotishlarga uchrayotgani ta’kidlanib, o‘tgan hafta davomida RF Qurolli Kuchlarining 2-Armiya Korpusi deb ataladigan bo‘linmalarida yo‘qotishlar taxminan 800 kishini tashkil etgan.
Ukraina Qurolli Kuchlarining Donetsk va Lugansk yo‘nalishlaridagi guruhlari kuniga 9 ta hujumni qaytargan, 8 ta tank, 44 ta zirhli jangovar mashina, 16 ta mashina va 10 ta artilleriya tizimini yo‘q qilgan.
UQKga ko‘ra, Rossiya qo‘mondonligi Ukraina bilan chegarada provokatsiyalarni amalga oshirish uchun Moldovaning Pridnestrove-Moldaviya Respublikasi hududida joylashgan harbiy bo‘linmalarini jalb qila boshlagan.
Avvalroq Ukraina qo‘shinlari mamlakat janubida va Kiyev viloyatidagi hududlarni ozod qilishda muvaffaqiyatlarga erishayotgani aytilgandi.
Rossiya-Ukraina urushi
Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.
Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.
24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.
Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.
25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.
Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.
Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.
Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.
Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.
LiveBarchasi