Rossiya Kiyevga hujum tayyorlamoqda. Jangga Qodirov va “Vagner” jangchilari tashlanadi

Rossiya aviatsiya va raketa zarbalari ko‘magida Ukrainaga qarshi hujum operatsiyasini davom ettirmoqda, ayniqsa Kiyevni o‘rab olishga katta e’tibor qaratmoqda. Bu haqda Ukraina Qurolli Kuchlari bosh shtabi ma’lum qildi.

“Kun davomida dushman Kiyevga hujum uyushtirish uchun qayta to‘plandi. Bosqinchilar hujum uchun Rossiya maxsus gvardiyasining Ramzan Qodirov (Grozniy) nomidagi polkidan, “Kuzbass” (Kemerovo) maxsus kuchlarining 27-otryadi, 604-markazning eng jangovar bo‘linmalari, Milliy gvardiyaning “Vityaz” (Moskva) maxsus kuchlari va “Liga” xususiy harbiy kompaniyasi (sobiq “Vagner” XHK) jangarilarini jadb qilmoqchi”, deyiladi xabarda.

Bosh shtabning ta’kidlashicha, Polesskiy yo‘nalishida dushman Rossiya Qurolli Kuchlarining 29, 35, 36-qo‘shma armiyalari, Sharqiy harbiy okrugning Tinch okean floti va RF Havo-desant kuchlarining alohida bo‘linmalaridan foydalangan holda Polesskoye, Povara, Borodyanka, Bishev, Gorenichi, Demidov aholi punktlarida to‘plangan.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.