Kuleba G‘arb qurol bermasa, Ukraina qanday kurashishini aytdi

G‘arb davlatlari Kiyevga qurol yetkazib berishni to‘xtatsa ham uning mamlakati Rossiyaga qarshilik ko‘rsatishni davom ettiradi va “belkuraklar bilan kurashadi”. Bu haqda Ukraina Tashqi ishlar vaziri Dmitriy Kuleba ARD telekanali efirida aytib o‘tdi.

“Agar qurolimiz bo‘lmasa, mayli, belkurak bilan kurashamiz, lekin o‘zimizni himoya qilamiz, chunki bu bizning mavjudligimiz uchun urushdir. Shunday qilib, biz qanchalik tez qurol olsak, ular [Kiyevga] qanchalik tezroq yuborilsa, bizga shunchalik yordam bo‘ladi. Agar qurol kechroq yuborilsa ham, biz baribir “rahmat” deymiz, lekin ko‘p narsa yo‘qotilgan, ko‘p qurbon berilgan bo‘ladi”, deydi Kuleba.

Shu bilan birga, Kulebaning ta’kidlashicha, G‘arbdagilar hech kim Ukraina qurol-yarog‘ yetkazib bermasa, Kiyev yon berishga tayyor bo‘lishiga ishonmasligi kerak. 

Bundan tashqari, vazir Ukrainada Rossiyadagiga qaraganda ancha kam qurol borligini tan olgan. 

“Biz bunday nomutanosiblik bilan urushda g‘alaba qozona olmaymiz”, deya xulosa qilgan u Kiyevga havo hujumidan mudofaa tizimlariga ehtiyoj borligini ta’kidlab.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.