Kiyev ostonasida Rossiyaning uchta uchog‘i urib tushirildi

Bugun, 25 fevral kuni tunda Ukrainaning Belaya Serkov shahrida (Kiyev viloyati) katta ehtimol bilan Rossiya desantchilarini olib ketayotgan Il-76 harbiy-yo‘lovchi samolyoti urib tushirildi. Bu haqda UNIAN Ukraina Maxsus aloqa va axborotni himoya qilish davlat xizmatiga tayanib, xabar berdi.

“Tezkor ma’lumot. Il-76 Belaya Serkov osmonida urib tushirildi”, deyiladi xabarda.

Shuningdek, Kiyev ostonasida Rossiyaning jangovar Su-25 samolyoti va harbiy vertolyoti ham urib tushirilgani aytilmoqda.

Bundan tashqari, Kiyevdagi Troyeina massivida 60 nafar diversant qo‘lga olingan. Bugun soat 2:00 dan keyin u yerda kuchli portlash yuz bergan. Keyin yana bir qator portlashlar sodir bo‘lgan.

Avvalroq poytaxt Kiyevda Rossiyaning razvedkachi-desantchilari bilan otishmalar bo‘layotgani haqida xabar bergan edik.

Rossiyaning Ukrainaga bosqini

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Buning ortidan Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirdi. Ko‘p o‘tmay Prezident Rossiya bilan diplomatik aloqani uzdi.

Rus qo‘shinlari dastlab Kiyev va Xarkovga raketa hujumi uyushtirdi. Prezident Zelenskiy mamlakatda harbiy holat e’lon qildi. Shuningdek, rasmiy idora rus qo‘shinlari Xarkov va Odessa viloyatiga kirib borganini bildirdi.

Hujum boshlanganidan ko‘p o‘tmay, LXR Ichki ishlar vaziri maslahatchisi Vitaliy Kiselev Schaste va Stanitsa shaharchalari LXR nazoratiga o‘tganini e’lon qildi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.