DXR qo‘shinlari Volnovaxani egallab oldi

Donetsk xalq respublikasi (tan olinmagan) qurolli kuchlari Volnovaxa shahrini ozod qildi. Bu haqda bugun, 11 mart kuni Rossiya Mudofaa vazirligi rasmiy vakili general-mayor Igor Konashenkov ma’lum qildi. 

"Donetsk xalq respublikasi qo‘shinlari guruhi Volnovaxa shahrini ozod qildi. Olginka, Veliko-Anadol, Zeleniy Gay aholi punktlari ham nazorat ostiga olindi. Chuqurlikdagi oldinga siljish 6 km gacha edi", deydi u. 

Unga ko‘ra, Donetsk xalq respublikasi xalq militsiyasi bo‘linmalari Mariupolda qamalni kuchaytirishda davom etgan. Sharqiy, shimoliy va g‘arbiy yo‘nalishlardan umumiy o‘tish 800 m gacha bo‘lgan. 

Konashenkovga ko‘ra, Rossiya Qurolli Kuchlari bo‘linmalari hujum operatsiyalarini davom ettirib, 17 km oldinga siljigan. 

"Rossiya Qurolli Kuchlari bo‘linmalari hujum operatsiyalarini davom ettirib, Petrovskoye - Yevgenovka - Oktyabrskoye chizig‘iga yetib kelishdi. Oldinga harakatlanish 17 km ni tashkil etdi”.

Harbiy aerodromlar

Konashenkovning aytishicha, Rossiya Qurolli kuchlari Ukrainadagi ikkita harbiy aerodromga uzoq masofali aniqlikdagi qurollar bilan zarba bergan. 

“11 mart kuni ertalab yuqori aniqlikdagi uzoq masofali qurollar Ukraina harbiy infratuzilmasiga zarba berdi. Lutsk va Ivano-Frankovskdagi harbiy aerodromlar ishdan chiqarildi”, deydi Konashenkov. 

Konashenkov, Rossiya aviatsiyasi va havo mudofaasi bir kunda Ukrainaga tegishli 3 ta Mi-24 vertolyoti, 8 ta uchuvchisiz havo vositasi, jumladan 5 ta Bayraktar TB-2 dronini urib tushirganini aytdi. Umumiy ma’lumotlarga ko‘ra, tezkor-taktik va armiya aviatsiyasi bir sutkada Ukraina qurolli kuchlarining 107 ta ob’ektini yo‘q qilgan: oltita qo‘mondonlik va boshqaruv markazlari va aloqa markazlari, 14 o‘q-dorilar va yoqilg‘i-moylash materiallari ombori, 11 harbiy texnika to‘plash joylari. 

Konashenkovning ta’kidlashicha, Rossiya Qurolli kuchlari bo‘linmalari operatsiya davomida Ukraina harbiy infratuzilmasining 3213 ta ob’ektini ishdan chiqargan. Yo‘q qilingan: 98 ta samolyot, 118 ta uchuvchisiz uchish apparati, 1041 ta tank va boshqa zirhli jangovar texnika, 113 ta ko‘p uchuvchi raketa tizimi, 389 ta dala artilleriyasi va minomyotlari, 843 ta maxsus harbiy texnika”, deydi u.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.