Budanov Ukrainadagi urush qachon va qanday yakunlanishini aytdi

Rossiya-Ukraina urushi 1991 yilda Ukrainaning o‘z chegaralariga chiqishi bilan tugashi kerak edi. Endi bu kelgusi yilda sodir bo‘lishi mumkin. Bu haqda  Ukraina Mudofaa vazirligi razvedka bosh boshqarmasi boshlig‘i Kirilo Budanov RBK-Ukraina’ga bergan intervyusida ma’lum qildi.

Uning so‘zlariga ko‘ra, urushdagi burilish davrining birinchi ko‘zga ko‘ringan natijalari shu yilning avgust oyida ko‘rinadi.

"Yil oxirida  faol jangovar harakatlar yetarli darajada kamayadi. Bu Rossiya qilgan sarguzashtning oxiri bo‘ladi”, deydi Budanov.

Eslatib o‘tamiz, yaqinda Ukraina Prezidenti Vladimir Zelenskiy “Katta yettilik” yetakchilariga Rossiyaning Ukrainaga qarshi keng ko‘lamli urushini qish boshlanishidan oldin to‘xtatmoqchi ekanligini aytib, bu borada yordam so‘raganida, AQSH bunday ssenariyni real emas deb hisoblagan edi.

Shu bilan birga, NATO Rossiyaning Ukrainadagi urushi uzoq davom etishiga ishonadi, biroq alyans ukrainaliklarga yordam qilishga va’da bermoqda.

Bundan tashqari, Yevropa yetakchilari ham Rossiya Federatsiyasi va Ukraina o‘rtasida “uzoqqa cho‘zilgan” urush xavfi haqida bir necha bor gapirgan.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.

Muhayyoxon Habibullayeva