Britaniya Rossiya fuqarosiga tegishli bo‘lishi mumkin bo‘lgan samolyotni hibsga oldi 

Olam

image

Buyuk Britaniya hukumati Rossiya Federatsiyasiga qarshi yangi sanksiyalar doirasida Rossiya fuqarosiga tegishli bo‘lishi mumkin bo‘lgan yana bir shaxsiy samolyotni hibsga oldi. Bu haqda Buyuk Britaniya Transport vaziri Grant Shepps ma’lum qildi.  

“Bugun men Rossiya bilan bog‘lanishi mumkinligi uchun sinovdan o‘tkazilayotgan navbatdagi samolyotni aniqlash va qo‘ndirish bo‘yicha shoshilinch qaror qabul qildim”, deb yozgan vazir Twitter’da. 

Shepps o‘tgan hafta Buyuk Britaniya hukumati Rossiya fuqarolariga tegishli bo‘lishi mumkin bo‘lgan ikkita shaxsiy samolyotni vaqtincha musodara qilganini ma’lum qilgan. 

Shuningdek, u har qanday rus samolyotining Buyuk Britaniya fazosiga kirishi endi jinoiy huquqbuzarlik sifatida tasniflanishini, qirollik hukumati mamlakat havo hududiga kirgan har qanday Rossiya samolyotini ushlab turish imkoniyatiga ega ekanini aytgan. 

Ma’lumot o‘rnida, joriy yilning 26 fevral kuni Shepps Buyuk Britaniya Transport vazirligi Rossiyaga qarshi sanksiyalarni kengaytirib, Rossiya Federatsiyasi Ukrainada “harbiy amaliyot” boshlaganidan so‘ng Rossiya xususiy samolyotlarining Buyuk Britaniyaga parvozini taqiqlagani haqida ma’lum qilgan.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.


Maqola muallifi

Teglar

Rossiya-Ukraina urushi Ukrainaga bosqin

Baholaganlar

31

Reyting

3

Maqolaga baho bering

Doʻstlaringiz bilan ulashing