Birinchi marta Ukraina urush boshidan beri qancha askarini yo‘qotgani ochiqlandi

Rossiya Federatsiyasining Ukrainaga hujumi boshlanganidan beri birinchi marta Ukraina Prezidenti devoni rahbari maslahatchisi Aleksiy Arestovich Ukraina Qurolli Kuchlarining yo‘qotishlar sonini aytdi. Bu haqda juma kuni Ukrainaning TSN agentligi xabar berdi.

“Mojaro boshida kuniga o‘rtacha 100 nafar askarimiz halok bo‘ldi”, degan Arestovich sobiq advokat Mark Feyginning savoliga javoban. Huquqshunos bu hisob-kitoblardan kelib chiqib, Ukraina armiyasi 10 ming nafargacha askaridan ayrildi desak bo‘ladimi, deya savol berganida, “ha, taxminan shuncha”, deb javob qaytargan.

Shu nuqtai nazardan, maslahatchi, Ukrainaga qurol yetkazishda juda sust bo‘lgan G‘arb ittifoqchilarini tanqid qilgan.

Bundan oldin Prezident devoni rahbarining yana bir maslahatchisi Mixail Podolyak Ukrainaning kunlik yo‘qotishlari 100-200 jangchi ekanligini aytgandi. Shuningdek, Ukraina mudofaa vaziri Aleksey Reznikov kuniga 100 nafargacha harbiy xizmatchi halok bo‘layotganini va 500 nafari jarohatlanayotganini aytdi.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.