Nuroboddan QALAMPIR.UZ'ga kelgan “bo‘sh” xat, Toshkentda bog‘chadagi ko‘zbo‘yamachilik, Termizdagi Damas`lar mojarosi va boshqa xabarlar

4 iyul kuni ham nihoyasiga yetay deb qoldi. Quyida sizlar bilan kunning eng muhim voqealariga qisqacha to‘xtalib o‘tamiz.

Jamiyat

Adliya vazirligi Gulnora Karimova saqlanayotgan hibsxonada o‘rganish o‘tkazmoqda

O‘zbekiston Respublikasi Adliya vazirligi mamlakatning Birinchi Prezidenti Islom Karimovning to‘ng‘ich qizi Gulnora Karimova saqlanayotgan Toshkent viloyati Zangiota tumanida joylashgan umumiy rejimdagi ayollar koloniyasida tekshiruv o‘tkazmoqda. 

Xayr, Prokuratura! Surayyo Rahmonova Allamjonov bilan ish boshladi

O‘zbekiston Bosh prokuraturasi Matbuot xizmati rahbari Surayyo Rahmonova prokuraturadagi faoliyatini yakunladi. Rahmonova shu kunning o‘zida Prezident Administratsiyasi huzuridagi Axborot va ommaviy kommunikatsiyalar agentligida ish boshladi. 

Shveysariyadan O‘zbekistonga 555 mln dollarni qaytarish jarayoni to‘xtatildi – Karimovaning advokati

O‘zbekiston Respublikasining Birinchi Prezidenti Islom Karimovning to‘ng‘ich qizi Gulnora Karimovaning advokati, Jenevadagi Mangeat Attorneys at Law advokatlik idorasi egasi va rahbari Greguar Manja Shveysariya O‘zbekistonga 555 mln dollarni qaytarishni to‘xtatganini ma’lum qildi.

Endi o‘qituvchilar mobil aloqaning imtiyozli tarifidan foydalanishi mumkin

O‘zbekiston Respublikasi Xalq ta’limi vazirligi va UMS mobil aloqa operatori o‘rtasida xalq ta’limi tizimi ishchilariga mobil aloqa xizmatlarini ko‘rsatish bo‘yicha hamkorlik Kelishuvi imzolandi.

Nurobod tumani hokimligidan QALAMPIR.UZ'ga arava quruq olib qochilgan xat keldi

Saytimizda “18 ming odamga XII asrda qurilgan 70 kishilik xaroba masjid: dinga e’tibor shumi?” nomli maqola e’lon qilindi. Unda hududdagi 3 ta mahalla (“Nurafshon”, “Arabota”, “Bunyodkor” mahallalari)da jami 18 mingga yaqin aholi istiqomat qilayotganiga qaramasdan, bor-yo‘g‘i bitta masjid borligi, u ham atigi 70 kishini sig‘dira olishi, kamiga tarixiy masjid, kun sayin nurab borayotgani, unga mutasaddilar tomonidan e’tibor yo‘qligi aytilgandi. 

Nurobod tumani hokimiyati QALAMPIR.UZ`da e’lon qilingan maqoladan so‘ng, masjidga borib o‘rganish o‘tkazdi va tahririyatga maktub yo‘lladi.

Yashnobod hokimi o‘rinbosari va MT bo‘limi mudirining suhbati Toshkentdagi ko‘zbo‘yamachilikni fosh qildi (audio)

QALAMPIR.UZ tahririyatiga poytaxt Toshkentdagi boshqaruv organlarining ko‘zbo‘yamachilik faoliyatini fosh etuvchi audionutq kelib tushdi.  Eshitib ko‘rdik. Unda Yashnobod tumani hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Sherzod  Zufarov va tuman maktabgacha ta’lim bo‘limi boshlig‘i Viloyat Akromovaning suhbatlaridan biri yozib olingan.

Termizdagi Damas`lar mashmashasi kengayyapti. Deputatlar, Adliya vazirligi va Monopoliyaga qarshi qo‘mita ishga aralashdi

O‘zbekiston Respublikasi Oliy Majlisi Qonunchilik Palatasi deputatlari Abdurashid Abduqodirov va Islomjon Zokirov Termiz shahrida Damas`larga yo‘lovchi tashish taqiqlanganiga munosabat bildirdi. Deputatlar Prezident qarori ijrosi uchun qabul qilingan hokim qaroriga jiddiy e’tiroz bildirdi.

Adliya vazirligi esa nizomga muvofiq hokimliklar tomonidan normativ-huquqiy hujjatlarni qabul qilishning belgilangan tartibiga rioya qilinishi ustidan nazoratni amalga oshirish Vazirlikning asosiy vazifalaridan biri hisoblanishini eslatib, hokimlikka tegishli qarorni bekor qilish uchun 10 kun muhlat berdi.

O‘zbekiston Respublikasi Monopoliyaga qarshi kurashish qo‘mitasi ko‘plab muhokama va noroziliklarga sabab bo‘lgan Termiz hokimining shaharda Damas taksilarining harakatini taqiqlash bo‘yicha qarori yuzasidan surishtiruv o‘tkazib, natijalarini e’lon qildi.

Olam

BAA amirining o‘g‘li Londonda o‘lik holda topildi

Londonda BAA amiri Sulton bin Muhammad al-Qosimining o‘g‘li Xolid bin Sulton al-Qosimiy o‘lik holda topildi. Sharja amirligi ishlar boshqarmasi ma’lumotiga ko‘ra, shayx Xolid Al Qosimiy 1 iyul kuni vafot etgan. Ma’lum bo‘lishicha, amir o‘g‘lining o‘limiga giyohvand moddani haddan ortiq iste’mol qilish sabab bo‘lgan. Aniqlanishicha, u o‘z uyining yuvinish xonasida yonida shpritslar bilan birga topilgan. Uning yoshi 39 da bo‘lib, Sharja amirining uchinchi o‘g‘li edi.

Video: Minskda bayram salyuti vaqtida fojia yuz berdi

Minskda bayram salyuti vaqtida baxtsiz hodisa yuz berdi. “Naviny.by” nashri xabar berishicha, salyut yer sathiga yaqin joyda portlashi oqiyuatida atrofdagilarni jarohatlagan. Voqea guvohlarining so‘zlariga ko‘ra, salyut otiladigan “Minsk – qahramonlar shahri” yodgorligi oldidan quyuq tutun bilan ikkita kuchli gumburlagan ovoz eshitilgan.

RFda maxfiy yadroviy suvosti kemasidagi yong‘in sababi aytildi

Rossiya Federatsiyasi mudofaa vaziri Sergey Shoygu suvosti apparatida yong‘in chiqish sababini ma’lum qildi. Vazir Rossiya Prezidenti Vladimir Putin bilan uchrashuvda suvosti appratining akkumulyator qismida chiqqan yong‘in Barens dengizidagi fojianing asosiy sababi ekanini aytdi.

Sport

Braziliyaning Amerika kubogidagi raqibi ma’lum bo‘ldi

Amerika kubogi finalida Braziliya Peruga qarshi maydonga tushadigan bo‘ldi. Kopa Amerikaning ikkinchi yarim finalida Chili va Peru terma jamoalari o‘zaro kuch sinashdi. O‘yinda 0:3 hisobi bilan Peru termasi g‘alaba qozondi. Gollarga Flores (21), Yotun (38) va Gerrero (90+1) mualliflik qildi.

“Chelsi” Sarri o‘rniga sobiq o‘yinchisini olib keldi

Londonning “Chelsi” klubi sobiq o‘yinchisi Frenk Lempardni jamoaga qaytardi. Lempard bu safar o‘yinchi emas, bosh murabbiy sifatida qaytdi. 

Klub u bilan 3 yillik shartnoma tuzgan. 41 yoshli Lempard jamoani 2018 yil yozidan boshqargan Muaritsio Sarrining o‘rnini egalladi. Italiyalik mutaxassis rahbarligida “aristokratlar” Angliya prem’er ligasida (APL) 3-o‘rinni egalladi va Yevropa Ligasi g‘olibi bo‘ldi.

Meksikalik qilichboz O‘zbekiston fuqarosi bo‘ldi

Meksikalik qilichbozlik ustasi Paola Pliyego O‘zbekiston fuqaroligini qabul qildi. Endi u 2019 yildagi Jahon kubogida O‘zbekiston sharafini himoya qiladi. Sportchi Meksikada korrupsiya qurboni bo‘lgani uchun fuqaroligini o‘zgartirishga qaror qilgan.