Украина НАТОдан кўпроқ қурол етказиб беришни сўради

Украина Ташқи ишлар вазири Дмитрий Кулеба НАТО давлатларини Киевни Россия билан уруш учун кўпроқ қурол-яроғ билан таъминлашга чақирди. Хусусан, у ҳарбий самолётлар, оғир ҳаво мудофаа тизимлари, ракеталар ва зирҳли техникаларни сўраган. Бу ҳақда “The Guardian” хабар бермоқда.

Кулеба, НАТО иттифоқчилари билан музокаралар ва икки томонлама учрашувлар кун тартибида учта масала борлигини айтди: “Қурол, қурол ва қурол”.

“Биз қандай қилиб ғалаба қозонишни биламиз, аммо Украина сўраган барча қуролларни барқарор ва етарли даражада таъминламасдан, бу ғалабалар катта қурбонлар билан бирга келади. Қанчалик кўп қурол олсак, шунчалик кўп инсон ҳаёти сақланиб қолади. Шунчалик кўп шаҳар ва қишлоқлар вайрон бўлмайди, бошқа Бучалар ҳам бўлмайди”, деган Украина дипломатияси раҳбари.

Шунингдек, у қуроллар ҳозир тинчликка хизмат қилишини таъкидлаган.

Вазирнинг қўшимча қилишича, ҳужум ва мудофаа қуроллари ўртасида фарқ йўқ – ҳар қандай қурол, жумладан, танклар ва тезкор реактивлар Украинани ҳимоя қилиш учун қўлланилади.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.