Россия Украинада бешта йўналишда эвакуация йўлакларини очди

Бугун, 11 март куни Россия Москва вақти билан соат 10:00 дан Украинада “сукунат режими”ни эълон қилади. РФ Мудофаа вазирлигига кўра, бешта шаҳардаги тинч аҳоли поезд, автобус ва ўз автомобилларда ҳудудни тарк этиши мумкин.

Гап қуйидаги шаҳар ва йўналишлар ҳақида бормоқда:

•    Киев ва унга туташ аҳоли пунктларидан иккита йўналиш бўйича: Беларусь ҳудуди орқали Гомел шаҳрига, кейинчалик ҳаво йўли билан Россияга етказилади; жанубий йўналишда - Украина томони билан келишилган ҳолда;

•    Чернигов шаҳридан иккита йўналиш бўйича: Беларусь ҳудуди орқали Гомел шаҳрига, кейинчалик ҳаво йўли билан Россияга етказилади; жанубий йўналишда - Украина томони билан келишилган ҳолда;

•    Суми шаҳридан иккита йўналиш бўйича: Белгород шаҳрига - кейин ҳаво, темир йўл ва автомобиль транспортида танланган йўналишлар ёки вақтинчалик яшаш жойларига; жанубий йўналишда Полтава шаҳрига - Украина томони билан келишилган ҳолда;

•    Харьков шаҳридан иккита йўналиш бўйича: Россия Федерацияси ҳудудига Белгород шаҳрига - кейин ҳаво, темир йўл ва автомобил транспортида танланган йўналишларга ёки вақтинчалик яшаш жойларига; Львов, Ужгород, Ивано-Франковскда - Украина томони билан келишилган ҳолда;

•    Мариупол шаҳридан иккита йўналиш бўйича: Новоазовск ва Таганрог шаҳарлари орқали Россия Федерациясининг Ростов-Дон шаҳрига, кейин ҳаво, темир йўл ва автомобил транспортида танланган йўналишларга ёки вақтинчалик яшаш жойларига;

•    бошқа аҳоли пунктларидан - Украина томони билан келишилган ҳолда.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарадаги тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.