“Олти ойдан кейин кўрамиз”. Трамп Путинга жавоб қайтарди

АҚШ Президенти Дональд Трамп Россия Президенти Владимир Путиннинг “санкциялар Россия иқтисодиётига таъсир қилмайди” деган баёнотига муносабат билдириб, ўзи жорий этган санкцияларнинг таъсири олти ой ичида намоён бўлишини айтди. Бу ҳақда у кеча, 23 октябрь куни Оқ уйдаги матбуот анжуманида сўз очди.

“Унинг шундай фикрда эканидан хурсандман. Бу яхши. Нима бўлишини олти ойдан кейин кўрамиз”, деди Трамп Путиннинг гапига жавобан.

Оқ уй матбуот котиби Кэролайн Ливитт журналистлар саволига жавоб берар экан, Трамп томонидан жорий этилган “анча жиддий” санкциялар Россияга босим ўтказиши ва иқтисодий зарар етказишини кутаётганини билдирди.

Бир кун олдин Путин Россияга қарши янги санкциялар ҳақида изоҳ бериб, бу чекловлар мамлакат иқтисодий ҳолатига “сезиларли таъсир кўрсатмаслигини” айтганди. 

“Ўзини ҳурмат қилган ҳеч бир давлат ҳеч қачон босим остида қарор қабул қилмайди”, деди у.

16 октябрь куни Трамп ва Путин телефон орқали суҳбатлашганидан сўнг, АҚШ Президенти Венгрия пойтахти Будапештда Россия раҳбари билан учрашишини эълон қилган эди. Бироқ 23 октябрда Трамп бу учрашувни бекор қилганини маълум қилди. 

“Менимча, биз керакли натижага эриша олмасдик. Шунинг учун, учрашувни бекор қилдим. Аммо келажакда буни амалга оширамиз”, деди у. 

Путин эса журналистларга Трамп “учрашувни бекор қилиш эмас, кўчириш ҳақида гапирганини” айтди.

Шу билан бир вақтда, АҚШ Молия вазирлиги Трамп президентлиги давридаги Россияга қарши илк санкциялар тўлқинини эълон қилди. Улар остига Россиянинг энг йирик икки нефть компанияси – “Лукойл” ва “Роснефть” тушди. Санкциялар жорий этилгандан сўнг, Россия нефтининг асосий харидорларидан бўлган Хитойнинг тўртта давлат нефть компанияси Россиядан нефть сотиб олишни тўхтатди.