Трамп ва Путин Венгрияда учрашади

АҚШ Президенти Дональд Трамп ва Россия Президенти Владимир Путин Венгрия пойтахти Будапештда учрашиш ва янги музокаралар ўтказишга келишиб олди. Бу ҳақда Оқ уй раҳбари кеча, 16 октябрь куни Путин билан бўлган телефон суҳбатидан сўнг, ўзининг Truth Social ижтимоий тармоғида ёзиб қолдирди.

Трампнинг айтишича, у Путин билан “Россия ва Украина ўртасидаги шармандали урушни тугатиш имкониятини муҳокама қилиш” учун учрашмоқчи. 

Унинг сўзларига кўра, учрашув олдидан икки давлат Президентларининг маслаҳатчилари учрашуви бўлиб ўтади, унда АҚШ делегациясига Давлат котиби Марко Рубио раҳбарлик қилади. 

“Эртага мен Оқ уйда Украина Президенти Владимир Зеленский билан учрашаман. У билан Путин билан бўлган суҳбатимни ва бошқа муҳим масалаларни муҳокама қиламиз. Бугунги телефон орқали суҳбатимиз илгари силжишга сабаб бўлди, деб ҳисоблайман”, дея ёзган Трамп. 

У, шунингдек, Путин уни Исроил ва Фаластин ҳаракати ҲАМАС ўртасидаги урушнинг тугатилиши билан табриклаганини билдирган. Унинг таъкидлашича, Яқин Шарқда тинчлик ўрнатилиши Россия ва Украина ўртасидаги келишув музокараларига ижобий таъсир кўрсатиши мумкин.

“Путин биринчи хоним Меланияга болалар ишларига бўлган эътибори учун миннатдорлик билдирди. У буни юқори баҳолади ва бу ҳамкорлик давом этишини таъкидлади. Шунингдек, биз Украинадаги уруш тугаганидан кейин Россия ва АҚШ ўртасидаги савдо муносабатларини ҳам муҳокама қилдик”, деган АҚШ раҳбари. 

Қайд этиш жоиз, бир неча кун олдин Дональд Трамп Зеленскийнинг Украина ҳужумга ўтиш режасини муҳокама қилишни хоҳлаётганини маълум қилган эди. Зеленский Вашингтонга сафар қилишини тасдиқлаб, бу сафарнинг мақсади – “АҚШ Президентига таклиф этиладиган Украина режаси бўйича ҳаракатлар изчиллигини муҳокама қилиш” эканини айтганди. Шунингдек, у айрим мудофаа компаниялари ва сенатор ҳамда конгрессменлар билан ҳам учрашишни режалаштирган.