Путин АҚШнинг Россияга қарши янги санкцияларига муносабат билдирди 

Россия Президенти Владимир Путин АҚШ томонидан Россия Федерациясига қарши янги санкциялар жорий этилиши мамлакат иқтисодиётининг ҳолатига сезиларли таъсир кўрсатмаслигини айтди. Бу ҳақда у бугун, 23 октябрь куни Рус географик жамиятининг XVII қурултойидан кейинги матбуот анжуманида сўз очди.

Россия Президенти санкциялар жорий этилишини Россияга босим ўтказишга уриниш деб атаган.

“Ҳеч бир ўзини ҳурмат қиладиган мамлакат ҳеч қачон босим остидан бирор иш қилмайди”, дейди Путин.

Унинг айтишича, Россиянинг жаҳон энергетика мувозанатидаги ҳиссаси жуда катта. Путин Россия ва Саудия Арабистони кўпроқ нефть ва нефть маҳсулотларини сотаётганини, АҚШ эса уларни кўпроқ истеъмол қилаётганини билдирган. Россия Президентининг қўшимча қилишича, ҳозирда жаҳон энергетика мувозанати шаклланган, уни бузиш – буни амалга оширишга уринаётган давлатларнинг манфаатига зид. 

Шунингдек, у АҚШ Президенти Дональд Трамп билан Россия нефти етказиб бериш ҳолатининг жаҳон нархларига, жумладан АҚШдаги нархларга таъсири ҳақида суҳбатлашганини маълум қилган. Путин, шу билан бирга, Россия ва АҚШ босимдан воз кечиб, узоқ муддатли жиддий мулоқот йўлига ўтса, ҳамкорлик қилиш учун кўплаб йўналишлар борлигига ишонч билдирган.

Бундан ташқари, Россия Президенти Трамп ўзининг биринчи президентлик даврида Россияга қарши энг кўп санкциялар жорий этганини эслатган. Унинг сўзларига кўра, мулоқот ҳар доим қарама-қаршилик, тортишув ёки урушни давом эттиришдан яхшироқ.

Эслатиб ўтамиз, аввалроқ АҚШ Молия вазирлиги Россиянинг “Роснефть” ва “Лукойл” компанияларига нисбатан қўшимча санкциялар киритган эди. Бундан ташқари, Дональд Трамп Россия ва Украинага мурожаат қилиб, Москва ва Киев Россия-Украина можаросини ҳал этишда оқилона йўл тутишлари кераклигини айтган.