Трамп Путин билан учрашувини бекор қилди

АҚШ Президенти Дональд Трамп Россия Президенти Владимир Путин билан Будапештда бўладиган учрашувни бекор қилганини айтди. Бу ҳақда у кеча, 22 октябрь куни НАТО Бош котиби Марк Рютте билан учрашувда сўз очди.

“Биз Путин билан учрашувни бекор қилдик. Менга шундай таассурот пайдо бўлди-ки, бу нотўғри. Менга шундай туюлди-ки, биз етишимиз керак бўлган нуқтага етолмаймиз. Шунинг учун учрашувни бекор қилдим. Аммо келажакда бу амалга оширилади”, деган Оқ уй раҳбари. 

Трамп, шунингдек, Россия Президенти Украинадаги урушни тўхтатмоқчи эканига ишонишини айтган.

“Менимча, Путин ва Зеленский ҳам тинчликни хоҳлашади. Бу урушни тугатиш вақти келди, агар мен Президент бўлганимда, бу уруш ҳеч қачон бошланмаган бўларди”, дея урғулади Трамп. 

Бироқ у Россия билан урушни тўхтатиш бўйича музокаралар секин кечаётгани сабабли ранжиганини ҳам билдирган. 

“Ҳар сафар Путин билан гаплашаман, яхши суҳбат бўлади, лекин натижа бўлмайди”, деган АҚШ Президенти. 

Шу билан бирга, АҚШ Давлат департаменти ва делегациялар ўртасида режалаштирилган музокаралар ҳам қолдирилган. 

Будапештдаги учрашув Трамп ва Путин ўртасидаги 16 октябрь телефон суҳбатида келишилган, аммо аниқ сана белгиланмаган эди. Кейинчалик, 21 октябрь куни ОАВда саммит бекор қилингани хабар қилинди. Бу қарор 20 октябрда АҚШ Давлат котиби Марко Рубио ва Россия Ташқи ишлар вазири Сергей Лавров ўртасидаги телефон суҳбатидан кейин қабул қилингани айтилмоқда.

Трамп ҳам, Путин ҳам учрашув бўлмаслигига кичик ишора қилган эди, лекин Венгрия томони тайёргарлик давом этаётганини рўкач қилиб, ОАВда тарқатилаётган хабарлар ёлғон эканлигини айтди.