Нишонда яна Шодмонов. Энди Қонунчилик палатаси вазирга “тиш қайради”

north_east

“Шифокор”ларимиз таъмагирликдан қониқмай, чақалоқларни пуллаяпти – Йўлдошев (видео)

north_east

Шодмонов коррупция билан боғлиқ ҳолатларда ўзини айблади

Ўзбекистон Республикаси Соғлиқни сақлаш вазири Алишер Шодмонов яна нишонда. Парламент сўровига вазир жўнатган жавоб депутатларни қониқтирмади. Бу ҳақда Олий Мажлис Қонунчилик палатасининг расмий сайтида хабар берилди. 

Олий Мажлис Қонунчилик палатасида Ўзбекистон Республикаси Соғлиқни сақлаш вазири Алишер Шодмоновнинг “Тиббиёт соҳасида хусусий сектор улушини янада ошириш, унинг ривожланишига кўмаклашиш ҳамда соҳага хорижий инвестицияларни жалб қилиш юзасидан амалга оширилаётган ишлар тўғрисида”ги парламент сўровига жавоби муҳокама этилди.

Парламент сўрови юборилишига эса, ўз навбатида, депутатлар томонидан ўтказилган ўрганишлар натижаси асос бўлди. Кўринадики, соғлиқни сақлаш тизимида хусусий секторнинг иштирокини кенгайтириш ва рағбатлантириш борасида ижобий кўрсаткичлар билан бир қаторда, ҳудудларда хусусий тиббиёт муассасаларининг фаолиятини кенгайтириш учун шароитлар етарли эмас ҳамда соғлиқни сақлаш соҳасида хусусий секторнинг барқарор ривожланишига тўсқинлик қилаётган масалалар ҳамон сақланиб қолмоқда. Хусусан, тадбиркорларга ер ажратиш, бўш турган объектларни “ноль” қийматида бериш, имтиёзли кредитлар ажратиш, тайёр объектларни коммуникация тармоқларига улаш борасида қатор муаммолар мавжуд.

Парламент сўрови орқали соғлиқни сақлаш соҳасида хусусий секторнинг барқарор ривожланишига тўсиқ бўлаётган масалаларни тизимли равишда ҳал этиш юзасидан кўрилаётган чора-тадбирлар, хусусий тиббиёт соҳасига хориждан инвестициялар ва юқори малакали мутахассислар жалб этишни кенгайтириш бўйича амалга оширилаётган ишлар, ҳудудларда хусусий тиббиёт муассасалари тармоғининг фаолиятини фаоллаштириш ва кенгайтириш учун қулай шароитлар яратиш борасида олиб борилаётган ишларнинг ҳолати, тиббий хизматлар экспортини ривожлантириш юзасидан кўрилаётган чора-тадбирлар юзасидан асослантирилган тушунтириш бериш Соғлиқни сақлаш вазиридан талаб этилди.

“Соғлиқни сақлаш вазирининг мазкур сўровга юборган жавоб хатида депутатлар томонидан кўтарилган масаланинг ечимини топиш учун бажарилган амалий ишлар қайд этилиши ўрнига Ўзбекистон Республикаси Президенти томонидан соҳага оид қабул қилинган Фармон ва қарорлардаги статистик маълумотларни келтириш билан чекланилгани ажабланарли бўлди. Бошқача айтганда, вазирлик парламент сўровига масъулият билан ёндашмагани яққол кўзга ташланди ва ушбу жавоб депутатларни қониқтиради, деб бўлмайди.

Таъкидлаш лозимки, парламент сўровига жавоб Қонунчилик палатасининг навбатдаги мажлисида муҳокама этилиши лозим. Унгача бўлган даврда депутатлар Соғлиқни сақлаш вазирининг парламент сўровига йўллаган жавобини ўзгартириши ва унда кўтарилган муаммоларни ҳал этилиши борасида аниқ ишлар бажарилганлиги тўғрисида вазирнинг шахсан ўзи Қонунчилик палатаси мажлисида ахборот беришини умид қилмоқда. Сўров натижаси шундай ҳал этилгандагина жавоб депутатларни қаноатлантирган бўлар эди”, дейилади Қонунчилик палатаси хабарида.

Эслатиб ўтамиз, ўтган йилнинг декабрь ойи охирларида Ўзбекистон Республикаси Олий Мажлиси Сенатида бўлиб ўтган йиғилишда иштирок этмагани учун Алишер Шодмоновни Президент маслаҳатчиси Абдужаббор Абдувоҳидов қаттиқ танқид қилган эди. Шодмонов Сенат йиғилишидан бехабар бўлганини иддао қилди. Бироқ, унга Сенат томонидан хат киритилган. Шу боис Олий Мажлис Сенати Шодмонов ва Соғлиқни сақлаш вазирлигидаги ички интизом устидан Ҳукуматга мурожаат киритди. Вазирлар Маҳкамаси мазкур ҳолат бўйича совуққонликка нисбатан чора кўрди.