Кўр ҳассасини бир марта йўқотади. Тўқаев кучишлатарларга муҳим топшириқ берди

Қозоғистон Президенти Қосим-Жомарт Тўқаев Хавфсизлик кенгашига махсус операция кучларини яратиш бўйича ишларни тезлаштириш ва миллий хавфсизлик тизимини ислоҳ қилиш бўйича аниқ таклифлар киритишни топширди. Бу ҳақда Оқўрда Матбуот хизмати хабар берди.

Давлат раҳбари раислигида ваколатли давлат органлари раҳбарлари иштирокида йиғилиш бўлиб ўтган.

Тадбирда Бош прокуратура, Миллий хавфсизлик қўмитаси, Мудофаа ва Ички ишлар вазирликлари вакиллари, шунингдек, Қозоғистон Президенти маъмурияти раҳбарияти ва Хавфсизлик кенгаши ходимлари иштирок этган.

Тўқаевга январь ойининг биринчи ўн кунлигида бир қатор ҳудудларда содир бўлган воқеалар юзасидан судгача терговнинг бориши, ўтказилган махсус операциялар якунлари, шунингдек, аҳолининг хавфсизлигини таъминлашга қаратилган бошқа чора-тадбирлар тўғрисида маълумот берилган.

Йиғилиш якунлари бўйича давлат раҳбари қатор аниқ топшириқлар берган. Қозоғистонда, хусусан, Олма-отада содир бўлган фожиали воқеаларни ҳар томонлама ўрганиш, тинч аҳоли ўлимининг аниқ сонини аниқлаш, ўта оғир вазиятларда ҳуқуқни муҳофаза қилиш органларининг ҳаракатларини мувофиқлаштириш бўйича янги меъёрий-ҳуқуқий базани ишлаб чиқиш масалаларига алоҳида эътибор қаратилган.

Президент аксилтеррор операцияси давомида фуқароларнинг ҳуқуқлари бузилишининг олдини олиш ва тергов ҳаракатларини ўтказиш муҳимлигини таъкидлади.

Қозоғистонда намойишлар 

Қозоғистонда норозилик акциялари янги йилнинг илк кунларидан бошланди. Жанаозен шаҳрида автомобиль эгалари суюлтирилган газ нархи 120 тенгега (қарийб 3 минг сўм) кўтарилганидан норози бўлиб, оммавий митингга чиқди. Тобора оловланган намойишлар ортидан Ҳукумат комиссияси Ақтау шаҳридаги “Ынтымак” майдонида намойишчилар билан учрашган. Учрашув давомида суюлтирилган газ нархини пасайтириш ва Манғистау вилоятида газ нархини литри учун 50 тенге этиб белгилаш тўғрисида қарор қабул қилинган.    

Музокара давомида томонлар барча юзага келаётган муаммоларни конструктив мулоқотнинг асосий оқимида ва амалдаги қонунчилик доирасида ҳал қилишга келишиб олган.    

Шунингдек, митинг иштирокчилари жавобгарликка тортилмаслигига ҳам кафолат берилганди. Лекин, 5 январь куни Қозоғистон ҳуқуқ-тартибот идоралари мамлакатнинг бир қанча вилоятларида содир этилган ноқонуний ҳаракатлар чоғида жамоат тартибини бузганлик учун 200 дан ортиқ кишини қўлга олди.  

5 январь куни, шунингдек, Қозоғистоннинг амалдаги Ҳукумати истеъфо берди. Президент Қосим-Жомарт Тўқаев Ҳукумат истеъфосини қабул қилди. Шунингдек, Қозоғистоннинг Биринчи Президенти - Элбоши Нурсултон Назарбоев Қозоғистон Хавфсизлик кенгаши раиси лавозимидан кетди. Унинг ўрнини Президент Тўқаев эгаллади.

Бу орада ижтимоий тармоқларда Назарбоев ва унинг оиласи мамлакатни тарк этгани, жияни Самат Абиш ҳибсга олингани ҳақида хабарлар тарқалди. Бироқ буларнинг ҳеч бири исботини топмади. Шундан сўнг, Элбошининг Матбуот котиби Айдос Укибай Назарбоев мамлакат пойтахтида бўлиб турганини маълум қилди.

Шунингдек, Миллий хавфсизлик қўмитаси раиси Карим Масимов лавозимидан озод этилди. Унинг ўрнини Ермек Сагимбаев эгаллади.

Қозоғистонда бутун мамлакат бўйлаб 19 январгача фавқулодда ҳолат жорий этилди. Шунингдек, шу кунларда соат 23:00 дан 07:00 гача комендантлик соати амалда бўлади.

Президент Республика Сакен Исабековни давлат қўриқлаш хизмати раҳбари этиб тайинлаш тўғрисидаги фармонни имзолади.

Тўқаев мамлакатдаги норозилик вазиятига Ҳукумат, хусусан, Энергетика вазирлиги, шунингдек, “Казмунайгаз” ва “Казакгаз” компанияларини айблади.

Коллектив хавфсизлик шартномаси ташкилоти (ОДКБ) мамлакатга чекланган муддатга тинчликпарвар кучларни киритиш тўғрисида қарор қабул қилди. 6 январь куни Россия, Беларусь, Арманистон ва Қирғизистон ҳарбийларидан иборат КХШТ тинчликпарвар контингенти Қозоғистонга кирди. Хорижий ҳарбийларга муҳим аҳамиятга эга объектларни қўриқлаш вазифаси топширилди. КХШТ контингенти кеча Қозоғистонни тарк этишни бошлади. Ҳозиргача Беларусь, Арманистон ва Россия ҳарбийлари ортга қайтгани ҳақида хабар берилди.