Каримовларнинг очилган сири, ўлимга ҳукм қилинган боксчи, дараги чиққан Назарбоев... Бугун нималар бўлди?

Жамият 

Ўзбекистонда дрон ишлаб чиқариш бошланди

Ўзбекистонда замонавий технологиялар асосида учувчисиз учиш аппаратлари ишлаб чиқариш йўлга қўйилди. Бу ҳақда Мудофаа саноати давлат қўмитаси маълум қилди.

Қайд этилишича, қўмита тасарруфида Учувчисиз авиация мажмуаларини илмий-ишлаб чиқариш маркази ташкил этилди.

Мазкур Марказ томонидан халқаро техник талаб ва стандартларга тўлиқ жавоб берадиган “Лочин” номли учувчисиз учиш аппаратларини ишлаб чиқариш йўлга қўйилди.

Ўзбек илм-фани оғир жудоликка учради

Ўзбекистон Республикаси Фанлар академияси аъзоси Бахтиёр Назаров 77 ёшида вафот этди. Бу ҳақда Фанлар академияси Матбуот хизмати хабар берди.

Қайд этилишича, бугун, 18 январь куни академик, ўзбек адабиётшунослигидаги йирик олим Бахтиёр Аминович Назаров 77 ёшида вафот этган. 

Ўзбек-қозоқ чегарасида ушланган талатўп иштирокчиси ўзбекистонлик бўлмаган

Аввалроқ, Қозоғистон жанубида Миллий хавфсизлик қўмитаси чегара хизмати ходимлари Ўзбекистон фуқаросини ушлагани ҳақида хабар берган эдик. Унинг қўл телефонидан январь ойида Қозоғистондаги тартибсизликлар вақтида тасвирга олинган видеолар топилганди.

Ўзбекистон Республикаси Ташқи ишлар вазирлиги мазкур хабарга расмий муносабат билдирди.

Қайд  этилишича, Ўзбекистоннинг Олма-ота шаҳридаги Бош консулхонаси томонидан Қозоғистон Республикаси Миллий хавфсизлик қўмитаси матбуот хизматидан маълумот олган. Унга кўра, қўлга олинган шахс Ўзбекистон Республикаси фуқароси эмас.

Тошкент вилоятида “картошка” ичидан 77 кг наркотик топилди

Тошкент вилоятида Damas русумли автомобилда 3 та қопда картошка шаклидаги боғлам ичида бўлган 77 килограмм опий ва гашиш ортиб кетаётганлар қўлга олинди. Бу ҳақда Давлат божхона қўмитаси Матбуот хизмати хабар берган.

Қайд этилишича, жорий йилнинг 13 январь куни Тошкент туманининг Ҳасанбой қишлоғида Давлат божхона қўмитаси ва Давлат хавфсизлик хизмати ходимлари томонидан ўтказилган тезкор тадбирда кузатув остидаги шахслар Damas русумли автомашинага 3 та қопни ортиб кетаётган вақтда қўлга олинган.

Қопларда картошка шаклига келтирилган 481 дона ўрамлар борлиги аниқланган. Уларнинг ичидан ўрами билан ҳисоблаганда 77 кг 95 граммни ташқил қилувчи опий ва гашиш топилган. 

Каримовлар оиласидаги можаролар: Марям Тилляева оила сирини очди

Ўзбекистон Республикаси Биринчи Президенти Ислом Каримовнинг набираси Марям Тилляева онаси Лола Каримова-Тилляева унга Гулнора Каримованинг оиласи билан мулоқот қилишни тақиқлаганини айтди. Бу ҳақда у Instagram’даги жонли мулоқот вақтида айтиб ўтди.

Марям Тилляеванинг сўзларига кўра, у ва Гулнора Каримованинг қизи Имон 23 ёшда. Имон ундан тахминан 6-7 ойлик катта.

“Биз бобомникига келганда бирга вақт ўтказардик. Биз оналаримиз гаплашишни тўхтатмагунча яхши дўст бўлганмиз. Улар гаплашишни тўхтатгач, бизга, менга тақиқлашди. Имонга ҳам тушунтиришди. Аммо бу менга алам қилди, чунки опам бор, лекин у ҳақда ҳеч нарса билмайман”, дейди Марям Тилляева.

Раққосалар билан дам олиб, ишдан “учган” амалдор эски лавозимига қайтди

Ўтган йили ресторанда раққосалар билан дам олгани акс этган видео тарқалиши билан ишдан олинган Нозим Муратов қайтадан Сирдарё тумани Ободонлаштириш бошқармаси бошлиғи лавозимига тайинланди. Бу ҳақда вилоят ҳокими имзолаган қарорда келтирилган. 

Қарорга мувофиқ, Нозим Муратов 2021 йил 30 декабрдан Сирдарё тумани Ободонлаштириш бошқармаси бошлиғи лавозимида икки ойлик синов муддати билан ишга тайинланган.

“Бешта фан бирлаштирилади”. ХТВ география атрофидаги баҳсга муносабат билдирди

Ижтимоий тармоқларда мактабларда география фани учун дарс соатлари ўзгариши кўплаб эътирозларга сабаб бўлмоқда. Ушбу ҳолат юзасидан Халқ таълим вазирлиги муносабат билдирди.

Қайд этилишича, Ўзбекистон Президентининг “Кимё ва биология йўналишларида узлуксиз таълим сифатини ва илм-фан натижадорлигини ошириш чора-тадбирлари тўғрисида”ги қарори билан миллий ўқув дастурига киритилган ўзгартиришларга кўра, 2022-2023 ўқув йилидан бошлаб, 1-6-синфларда ягона “Табиий фанлар” (Science) жорий қилиниши белгиланган.

Олам

“Omicron”нинг янги мутацияси аниқланди

Швециянинг Уппсала шаҳридаги Академик лабораторияда коронавируснинг “omicron” штаммининг мутацияга учраган янги тури аниқланган. Бу ҳақда кеча, 17 январь куни мамлакатнинг “Uppsala Nya Tidning” нашри хабар берган.

Мутацияга учраган вируснинг субварианти 14 январь куни Уппсала шаҳри бўйлаб 3 кишида аниқланган. 

Ҳозирча олимлар томонидан аниқланган янги тур “BA.2” дея номланмоқда. Аниқланган янги тур ҳақида фанга жуда ҳам кам нарса маълум.

Канада Россия билан келишолмаётган Украинага “спецназ”ини юборди

Канада махсус топшириқлар бўлинмасини НАТО ҳарбий альянси ва Россия ўртасидаги зиддият кучайган бир пайтда Украинага жойлаштирди. Бу ҳақда “Global News” нашри хабар берди.

Хабарда таъкидланишича, Канада Украинага “спецназ”нинг кичик контингентини Россиянинг тахминан 100 000 ҳарбийси мамлакат чегарасида бўлгани учун жойлаштирган. Шунингдек, бундай қадам НАТО иттифоқчиларининг Россия агрессиясини тўхтатиш ва Украина ҳукуматини қўллаб-қувватлаш йўлларини аниқлашга қаратилган саъй-ҳаракатларининг бир қисмидир. 

“Тўқаев тўлиқ ҳокимиятга эга”. Назарбоев топилди ва мурожаат билан чиқди

Қозоғистоннинг мамлакатдан чиқиб кетгани айтилган Биринчи Президенти – Элбоши Нурсултон Назарбоев халққа мурожаат йўллади. У ватанидан кетмаганини, ҳамон пойтахтда эканини маълум қилган.

Назарбоевнинг таъкидлашича, Қозоғистоннинг амалдаги Президенти Қосим-Жомарт Тўқаев тўлиқ ҳокимиятга эга. Элбоши Президент ваколатини 2019 йилда топширган.

“Мен 2019 йилда Президент ваколатини Қосим-Жомарт Тўқаевга топширдим ва  шундан бери пенсионер ҳисобланаман. Айни вақтда эса Қозоғистон пойтахтида таътилдаман ва  ҳеч қаерга кетганим йўқ.

Президент Қосим-Жомарт Тўқаев тўлиқ ҳокимиятга эга ва у Хавфсизлик кенгаши раиси. Тез орада у “Нур-Отан” партияси раиси этиб сайланади. Мамлакат элитаси ўртасида ҳеч қандай қарама-қаршилик ва можаро йўқ. Бу борадаги миш-мишлар мутлақо асоссиз”, дейди Назарбоев.

Тўқаев Назарбоевнинг сўнгги лавозимини ҳам эгаллайди

Қозоғистоннинг ҳукмрон “Нур-Отан” партияси фавқулодда қурултой чақирди. Унда сиёсий бирлашманинг раиси Қозоғистоннинг Биринчи Президенти – Элбоши Нурсултон Назарбоев ўрнига амалдаги давлат раҳбари Қосим-Жомарт Тўқаев сайланиши кутиляпти.

Россия Украинадан дипломатларини эвакуация қилмоқчи – NYT 

Россиянинг Украинадаги икки консуллиги дипломатларига мамлакатни тарк этишга тайёрланиш буюрилди. Бу ҳақда “The New York Times” газетаси Украина хавфсизлик хизматининг юқори лавозимли амалдорига таяниб хабар берган. 

Шу билан бирга, нашр манбасининг таъкидлашича, жорий йилнинг 5 январь куни Украинани 18 киши — асосан россиялик дипломатларнинг болалари ва хотинлари тарк этган. Яқинда Киев ва Львовдаги консулликларни яна 30 га яқин одам тарк этиши қўшимча қилинган. 

АҚШ расмийсининг айтишича, Вашингтон яқинлашиб келаётган эвакуациядан хабардор.

Спорт

Роналду ва Месси “The Best” учун кимларга овоз берди?

FIFA 2021 йилнинг энг яхши футболчиси соврини учун берилган овозлар натижаларини эълон қилди.

Унга кўра овоз беришда иккинчи ўринни эгаллаган Аргентина терма жамоаси сардори Лионель Месси биринчи ўринга Неймарни (5 очко), иккинчи поғонага Килиан Мбаппени (3 очко) қўйган. Ҳар икки футболчи ҳам унинг ПСЖдаги шериклари ҳисобланади. Шунингдек, “Реал” ҳужумчиси Карим Бенземани (1 очко) 3-ўринга қўйган.

Португалия терма жамоаси сардори Криштиану Роналду эса йилнинг энг яхши футболчиси сифатида Роберт Левандовскини танлади. “Манчестер Юнайтед” вингери “Челси” ярим ҳимоячиси Нголо Кантени иккинчи, унинг жамоадоши Жоржиньони эса учинчи ўринга жойлагтирган.

“The Best” учун Ўзбекистон номидан кимлар овоз берди?

Аввалроқ, FIFA 2021 йилнинг энг яхши футболчиси учун овоз бериш натижаларини эълон қилгани ҳақида хабар берган эдик.

Мазкур маросимда энг яхши футболчини номини аниқлаш учун, Ўзбекистон номидан овоз бериш жараёнида МТЖ бош мураббийи сардори Сречко Катанец, терма сардори Элдор Шомуродов ҳамда ЎФА матбуот ва медиа департаменти раҳбари Даврон Файзиев иштирок этди.

Эронлик боксчи ўлимга ҳукм қилинди

Бокс бўйича Эрон Ислом Республикаси чемпиони Муҳаммад Жавод Вафои 2019 йилги норозилик намойишларида иштирок этгани учун ўлимга ҳукм қилинди. У ҳукумат биноларига ўт қўйиш ва уларни вайрон қилишда айбдор, деб топилди.

Ижтимоий тармоқ фойдаланувчилари расмийларни унинг ҳаётини сақлаб қолишга чақиришди ва Twitter’да “SaveMohammadJavad” хештеги пайдо бўлди.

Эронда тақиқланган Халқ Мужоҳидлари (МEК) мухолифат гуруҳининг сиёсий қаноти Эрон Миллий Қаршилик Кенгаши (NCRI) баёнотида, унга қарши айбловлар МEК’ни қўллаб-қувватлашни ўз ичига олганини таъкидлади.