Тўқаев Назарбоевнинг сўнгги лавозимини ҳам эгаллайди

Қозоғистоннинг ҳукмрон “Нур-Отан” партияси фавқулодда қурултой чақирди. Унда сиёсий бирлашманинг раиси Қозоғистоннинг Биринчи Президенти – Элбоши Нурсултон Назарбоев ўрнига амалдаги давлат раҳбари Қосим-Жомарт Тўқаев сайланиши кутиляпти.

“Нур-Отан” раисининг биринчи ўринбосари Бауйржан Байбекнинг партиядаги йиғилишда таъкидлашича, сиёсий бирлашма бутун кучини (яъни 800 минг партия аъзосини) мамлакат Президенти Қосим-Жомарт Тўқаев томонидан қўйилган вазифаларни бажариш учун сафарбар этган.

“Президент Қосим-Жомарт Кемелевич барчамизни ягона мақсад – долзарб масалаларни тезкорлик билан ҳал этиш ва Янги Қозоғистонни барпо этиш йўлида бирлашишга чақирди. “Жумйла котерген зҳук зҳенил”, дейишарди аждодларимиз. “Нур Отан” партияси ҳамиша мамлакат бирлиги ва ички барқарорлигини сақлаш муҳимлиги ҳақида гапириб келади”, дейди партия раисининг биринчи ўринбосари.

Бауйржан Байбек мамлакатни мустақилликка олиб чиққан Нурсултон Назарбоев ва унинг хизматлари ҳақида ҳам гапириб ўтган.

“Ўтмишни холисона баҳолашда ҳар биримиз, энг аввало, ўзимизнинг ахлоқий тамойилларимизга, ор-номус ва виждон тушунчаларига амал қилишимиз керак. 90-йилларда Қозоғистоннинг тўлақонли давлат бўлиши ёки бўлмаслиги номаълум бўлган мамлакат шаклланишининг энг мураккаб даврида, мамлакатимиз Нурсултон Назарбоев бошчилигида институтларни яратиш ва мустаҳкамлаш орқали ўз мустақиллигига эришди. Бизни бутун дунё ҳамжамияти тан олди. 30 йил давомида давлатчилик асосларини мустаҳкамлаб, сарҳадларни белгилаб, юрт яхлитлигини сақлаб қолган Элбоши ва кекса авлод вакилларининг тарихий хизматлари миллий тарихда муносиб баҳоланиши шубҳасиз. Биринчи Президентимиз Нурсултон Назарбоев лавозимини тарк этгандан кейин барча ишларда уни айблашни пасткашлик деб биламан. Албатта, ҳар доим тузатилиши керак бўлган хатолар мавжуд. Президентимиз эълон қилган ислоҳотларнинг мазмун-моҳияти шундан иборат”, дейди Бауйржан Байбек.

Йиғилишда мамлакат мустақиллигига эндигина 30 йил тўлган ва ҳозирда Қозоғистон жамиятида давлатчилик анъаналарини, жумладан, ҳокимиятнинг узлуксизлигини шакллантириш ниҳоятда муҳим экани ҳам таъкидланди.

“Энди давлатчиликни асраш, боримизни кўпайтириш керак. Бинобарин, Элбоши асос солган “Нур Отан” партияси юрт бирлиги ва жамият барқарорлигини сақлашга қаратилган фаолиятини давом эттириши керак. Биз ҳозир бўлажак фавқулодда қурултойга тайёргарликни бошладик”, дейди Бауйржан Баибек.

Аввалроқ, қаредалиги номаълум бўлиб қолаётган Нурсултон Назарбоев Қозоғистон халқига мурожаат йўллагани ва мамлакатда бутун ҳокимият Тўқаевда эканини айтганди.

Қозоғистонда намойишлар 

Қозоғистонда норозилик акциялари янги йилнинг илк кунларидан бошланди. Жанаозен шаҳрида автомобиль эгалари суюлтирилган газ нархи 120 тенгега (қарийб 3 минг сўм) кўтарилганидан норози бўлиб, оммавий митингга чиқди. Тобора оловланган намойишлар ортидан Ҳукумат комиссияси Ақтау шаҳридаги “Ынтымак” майдонида намойишчилар билан учрашган. Учрашув давомида суюлтирилган газ нархини пасайтириш ва Манғистау вилоятида газ нархини литри учун 50 тенге этиб белгилаш тўғрисида қарор қабул қилинган.    

Музокара давомида томонлар барча юзага келаётган муаммоларни конструктив мулоқотнинг асосий оқимида ва амалдаги қонунчилик доирасида ҳал қилишга келишиб олган.    

Шунингдек, митинг иштирокчилари жавобгарликка тортилмаслигига ҳам кафолат берилганди. Лекин, 5 январь куни Қозоғистон ҳуқуқ-тартибот идоралари мамлакатнинг бир қанча вилоятларида содир этилган ноқонуний ҳаракатлар чоғида жамоат тартибини бузганлик учун 200 дан ортиқ кишини қўлга олди.  

5 январь куни, шунингдек, Қозоғистоннинг амалдаги Ҳукумати истеъфо берди. Президент Қосим-Жомарт Тўқаев Ҳукумат истеъфосини қабул қилди. Шунингдек, Қозоғистоннинг Биринчи Президенти - Элбоши Нурсултон Назарбоев Қозоғистон Хавфсизлик кенгаши раиси лавозимидан кетди. Унинг ўрнини Президент Тўқаев эгаллади.

Бу орада ижтимоий тармоқларда Назарбоев ва унинг оиласи мамлакатни тарк этгани, жияни Самат Абиш ҳибсга олингани ҳақида хабарлар тарқалди. Бироқ буларнинг ҳеч бири исботини топмади. Шундан сўнг, Элбошининг Матбуот котиби Айдос Укибай Назарбоев мамлакат пойтахтида бўлиб турганини маълум қилди.

Шунингдек, Миллий хавфсизлик қўмитаси раиси Карим Масимов лавозимидан озод этилди. Унинг ўрнини Ермек Сагимбаев эгаллади.

Қозоғистонда бутун мамлакат бўйлаб 19 январгача фавқулодда ҳолат жорий этилди. Шунингдек, шу кунларда соат 23:00 дан 07:00 гача комендантлик соати амалда бўлади.

Президент Республика Сакен Исабековни давлат қўриқлаш хизмати раҳбари этиб тайинлаш тўғрисидаги фармонни имзолади.

Тўқаев мамлакатдаги норозилик вазиятига Ҳукумат, хусусан, Энергетика вазирлиги, шунингдек, “Казмунайгаз” ва “Казакгаз” компанияларини айблади.

Коллектив хавфсизлик шартномаси ташкилоти (ОДКБ) мамлакатга чекланган муддатга тинчликпарвар кучларни киритиш тўғрисида қарор қабул қилди.