Исроил Дамашқни ракета билан ўққа тутди (видео)

Исроил Сурия пойтахти Дамашқдаги ҳарбий объектларга ҳаво ҳужуми уюштирди. Бу ҳақда Сурия армиясидаги ҳарбий манбасига таяниб, SANA агентлиги хабар берди.

Айтилишича, зарбалар 7 августга ўтар кечаси, маҳаллий вақт билан соат 02:20 да берилган. Расмий Дамашққа кўра, ҳаво ҳужумидан мудофаа тизимлари Голан тепаликларидан отилган ракеталарнинг бир қисмини уриб туширган.

Ҳужум оқибатида 4 нафар ҳарбий ҳалок бўлган, яна тўрт нафари яраланган.

Маълумот учун, “Ҳизбуллоҳ” ҳаракатининг бўлинмалари Дамашқ ва унинг чеккасида жойлашган. Бундан ташқари, худди шу ҳудудда Башар Асад армиясининг бўлинмалари ва Эрон Ислом инқилоби қўриқчилари корпуси зобитлари назорати остидаги ёлланма аскарлар отрядлари бор. 2011 йилда Сурияда фуқаролар уруши бошланганидан бери Исроил вақти-вақти билан Эрон томонидан қўллаб-қувватланган гуруҳлар ва Асад армиясининг ҳарбий обектларига зарбалар бериб келмоқда.

Эслатиб ўтамиз, жорий йилнинг март ойида Исроил самолётлари Суриянинг Алеппо (Халаб) халқаро аэропортига ракета ҳужуми, 30 мартда эса Дамашқ яқинидаги нишонларга ҳаво ҳужуми уюштирганди. 29 апрелда Исроил армияси Суриянинг Хомс вилоятидаги бир қатор нишонларга яна ракета учирди. Оқибатда уч нафар тинч аҳоли ҳалок бўлди. Исроил расмийлари эса анъанага содиқ қолган ҳолда бу борада баёнот беришдан ўзини тийган. 14 июнда Исроил ҳарбий-ҳаво кучларининг иккита F-15 тактик қирувчи самолёти босиб олинган Голан тепаликлари ҳаво ҳудудидан Сурия пойтахти Дамашқ яқинидаги объектларга тўртта масофадан туриб бошқариладиган авиабомбалар билан ҳужум қилди.

25 июнь куни Россия самолётлари Суриянинг Идлиб вилояти Жиср аш-Шугур шаҳри марказидаги сабзавот бозорини ўққа тутди. 2 июлда Сурия ҳаво ҳужумидан мудофаа кучлари мамлакатнинг марказий қисмлари бўйлаб Исроил томонидан берилган ракета зарбасини тўхтатди ва ракеталарнинг аксарият қисмини уриб туширди.

Кеча, 6 август куни Ливаннинг “Al-Akhbar” газетаси АҚШ бошчилигидаги коалиция Суриядаги ўз таъсир зонасида қўшинларни қайта тўплашга тайёрланаётганини ёзди.