Россия дипломатларини қувган Францияни жавобсиз қолдирмади

Олам 10997
image

Жорий йилнинг апрель ойида россиялик дипломатларнинг Франциядан чиқариб юборилишига жавобан Россия Франция дипломатик миссиясининг 34 нафар ходимини “персона нон грата” деб эълон қилди. Бу ҳақда РФ Ташқи ишлар вазирлиги тарқатган баёнотда келтирилган.

Қайд этилишича, бугун, 18 май куни Франция элчиси Пьер Леви Россия Ташқи ишлар вазирлигига чақирилган.

“Унга Франция ҳукуматининг Россиянинг Франциядаги дипломатик муассасаларининг 41 нафар ходимини “Россия агенти” деб эълон қилиш ҳақидаги провокацион ва асоссиз қарори муносабати билан кескин норозилик билдирилди. Бу қадам Россия-Франция муносабатлари ва конструктив икки томонлама ҳамкорликка жиддий зарар етказиши таъкидланди. Жавоб сифатида Франциянинг Россиядаги дипломатик муассасаларининг 34 нафар ходими “персона нон грата” деб эълон қилинди”, дейилади Россия ТИВ хабарида. 

Тақиққа учраган дипломатлар элчига тегишли нота тақдим этилган кундан бошлаб икки ҳафта ичида Россия ҳудудини тарк этишлари керак.

Эслатиб ўтамиз, Россия апрель ойида Европа ИттифоқиБолгария ва Германиянинг мамлакатдаги дипломатларини чиқариб юборганди. Май ойида эса ДанияБолгария ва Руминия дипломатларини “персона нон грата” деб эълон қилди.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.

Юлдуз Абдурашидова
Мақолага баҳо беринг
Баҳолаганлар: 41
Рейтинг: 3.1
t
×