Путин кинодан пропаганда мақсадида фойдаланишга қарор қилди

Россия Федерацияси Президенти Владимир Путин 2022 йилнинг 25 ноябрь куни Украинадаги урушда қатнашаётган аскарларнинг оналари билан учрашган бўлиб, у жорий йилнинг 2 январь куни ана шу учрашув якуни бўйича топшириқлар рўйхатига имзо чекди. Ҳужжат матни Кремльнинг расмий сайтида эълон қилинди. 

Топшириқлар рўйхати 11 банддан иборат бўлиб, унда мамлакатдаги қатор вазирликларга вазифалар юклатилган. Жумладан, Россия Президенти маданият вазирлигига кино тармоқларда неонацистик ва неофашистик мафкурага қарши, “махсус ҳарбий операция”га бағишланган ҳужжатли фильмларни намойиш этишни таъминлаш ва ватанпарварлик руҳидаги фильмлар кинофестивалини ташкил этишни таклиф қилган.

Қолаверса, маданият вазирлиги ҳамда таълим вазирлиги нотижорат ташкилотларни жалб қилинган ҳолда, “махсус ҳарбий операция”да қатнашган аскарларнинг қаҳрамонлиги ва жасоратига бағишланган санъат асарлари ва мактаб музейларини ташкил этиш ҳамда шу мавзуда мактабларда дарслар ўтилишини таъминлаш вазифаси белгиланган.

Шунингдек, Путин Россия Мудофаа вазирлигига ҳам ҳужжатли фильм ижодкорларига мардлик ва жасорат намоён бўлган кинематографик материалларни тайёрлашда ёрдам бериш вазифасини юклаган.

Россия давлат раҳбари йўналишларга кўра турли хил муддат белгилаган бўлиб, ҳужжатли фильмларга 2023 йил 1 февралгача, мактаблардаги музей ва ўтиладиган дарсларга эса 2023 йил 1 апрелгача муҳлат берган.

Россия-Украина уруши

Жорий йилнинг 21 февраль куни Россия Президенти Владимир Путин Кремлда Украина шарқидаги ўзини мустақил деб эълон қилган Луганск халқ республикаси (ЛХР) ва Донецк халқ республикасини (ДХР) тан олиш тўғрисидаги фармонни имзолади. Кейинроқ РФ республикаларни шу номдаги вилоятлар чегарасида тан олганини таъкидлаб, Украинага қарши уруш хавфини ошириб юборди.

Путиннинг фавқулодда қарори ортидан АҚШ, ЕИ, Канада, Австралия, Буюк Британия ва Япония расмийлари ҳам Россияга қарши санкциялар киритди.

24 февраль куни Россия Президенти Владимир Путин Украина шарқида Донбассда рус ҳарбийлари "махсус ҳарбий операция" бошлаганини эълон қилди ва рус қўшинлари Украинага ҳужум бошлади. Путин бу ҳаракатини Украина шарқидаги россияпараст сепаратист кучлар раҳбарлари шундай сўров юборгани билан оқлади.

Бундан аввалроқ Зеленский Россия фуқароларига рус тилида мурожаат қилиб, украинларга “на совуқ, на иссиқ, на гибрид уруш керак эмас”лигини, украинлар ҳужумчиларни кутиб олишга тайёрлигини билдирганди. Кўп ўтмай Президент Россия билан дипломатик алоқани узди. Президент Зеленский мамлакатда ҳарбий ҳолат эълон қилди.

25 февраль куни Зеленский Украинада умумий ҳарбий сафарбарлик эълон қилди. Армияга чақирув мамлакатнинг қатор вилоят ва шаҳарларида амалга оширилиши белгиланди.

Рус қўшинлари ҳозиргача Украинага шимол, шарқ ва жанубдан ҳужум қилиб келмоқда ва қатор ҳудудларни эгаллашга эришди. Аммо бу уруш Россиянинг дунёда яккаланиб қолишига олиб келди.

Украинага ҳужум бошланиши Россия иқтисодига оғир зарба берди. Рус компаниялари акциялари кескин арзонлашди, Москва биржасида савдолар мислсиз даражада пасайиш билан ўтди. Газпром, ЛУКОЙЛ ва бошқа йирик компаниялар йўқотишларга учради.

Ҳужум бошлангач, Европа давлатлари ва АҚШ Россияга қарши бир неча босқичли санкциялар жорий қилди. Россиянинг ВТБ, “Россия” банки, “Открытия”, “Новикомбанк”, “Промсвязьбанк”, “Совкомбанк” ва ВЭБ.РФ банклари SWIFT халқаро банклараро тизимидан узилди. АҚШ ва Европа Иттифоқи Россиянинг олтин-валюта захирасини блоклади.

Европа давлатлари, АҚШ, Канада Россия учун ўз ҳаво ҳудудини ёпди. Бу санкцияларга нейтрал давлат ҳисобланган Швейцария ҳам қўшилди. Уруш фонида Украинани Европа Иттифоқи аъзолигига қабул қилиш жараёни тезлашди.

Тан олинмаган Донецк халқ республикаси, Луганск халқ республикаси, Херсон ва Запорожье вилоятларининг Россия Федерацияси таркибига кириши бўйича ноқонуний референдумлар 2022 йил 23-27 сентябрь кунлари бўлиб ўтди. Москвага кўра, сайлов бюллетенларини қайта ишлаш натижаларига кўра, ДХРда Россия Федерациясига қўшилиш учун 99,23%, ЛХРда – 98,42%, Херсон вилоятида – 87,05%, Запорожье вилоятида – 93,11% овоз берилган. 30 сентябрь куни Россия Президенти Владимир Путин Кремлда ДХР, ЛХР, Херсон ва Запорожье вилоятларида ўтказилган псевдореферендумлар якунлари бўйича нутқ сўзлади, шундан сўнг ҳудудлар раҳбарлари билан Россия таркибига кириш тўғрисида битимлар имзоланди.