YeI Ukrainaga qachongacha qurol yetkazib berishi ma’lum bo‘ldi

Yevropa Ittifoqi Kiyevga zarur bo‘lgan vaqtgacha qurol yetkazib berishni davom ettirish niyatida. Bu haqda bugun, 16 avgust kuni kuni ichki bozor bo‘yicha Yevropa komissari Terri Breton Fransiyaning “France Info” radiosi efirida ma’lum qildi.

“Biz Ukrainaga zarur bo‘lgan vaqtgacha harbiy yuklarni yetkazib berishda davom etamiz. Biz Kiyevni qurol-yarog‘ bilan ta’minlash niyatidamiz, shuningdek fuqarolik mudofaasi uchun ham vositalar yetkazib berarmiz”, deydi u.

Shu bilan birga, Yevropa komissari YeI o‘z ehtiyojlari uchun qurol ishlab chiqarishni kengaytirishi kerakligiga to‘xtalib o‘tgan. 

“Geosiyosiy vaziyatning rivojlanishini inobatga olgan holda, biz o‘z avtonomiyamizni, jumladan, mudofaa sohasida ham mustahkamlashimiz kerak”, deydi Terri Breton.

Uning so‘zlariga ko‘ra, Yevropa “birinchi marta qurol-yarog‘ yaratishga bunchalik katta mablag‘ ajratadi”. 

“Yevroittifoq mamlakatlariga yangi tanklar, dronlar va kemalar yaratish bo‘yicha ilmiy-tadqiqot ishlarini olib borishda yordam berish uchun 7 milliard yevro ajratiladi. Biz bu ishni allaqachon birgalikda boshlaganmiz, endi esa birgalikda harbiy texnika sotib olishni rejalashtirmoqdamiz”, deydi u.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.