“Vagner” ortiq Ukrainada jang qilmaydi – Budanov 

Ukraina Mudofaa vazirligi Bosh razvedka boshqarmasi boshlig‘i Kirill Budanovning aytishicha, “Vagner” xususiy harbiy kompaniyasi endi Ukrainada jang qilmaydi. Bu haqda u “Ukrainskaya Pravda”ga bergan intervyusida ma’lum qilgan. 

Budanovning aytishicha, Rossiya rahbariyati Ukraina bilan murosaga kelgan va Prigojin isyoni Rossiya rejimining qat’iyatliligi haqidagi “afsona”ni yana bir bor yo‘qqa chiqargan. 

“Biz Rossiya rahbariyati bilan murosaga keldik. Yana bir bor Rossiya rejimining qat’iyatliligi haqidagi afsona yo‘qqa chiqarildi. Rossiya Federatsiyasi harbiy-kosmik kuchlari yo‘qotishlarga uchratilgandi. Shuningdek, endi “Vagner” ham yo‘q. Va bu Rossiya Federatsiyasining har qanday holatda ham g‘alabaga mohirlik bilan erishishi mumkin bo‘lgan eng samarali bo‘linmasi edi”, deydi u. 

Eslatib o‘tamiz, “Vagner” xususiy harbiy kompaniyasi Ukrainadagi urushga 2022 yilning aprel oyidan jalb qilingan edi. Ushbu bo‘linmaning sa’y-harakati bilan urushning eng qonli janglari olib borilgan Baxmut shahrida shu yilning 20 may kuni 224 kunlik missiyadan so‘ng Rossiya nazorati o‘rnatilgandi. Harbiy kompaniya rahbari Yevgeniy Prigojinning aytishicha, buning uchun Ukraina urushiga jalb qilingan 50 minglik “Vagner” qo‘shinining beshdan bir qismi halok bo‘lgan. 

Joriy yilning 24 iyun kuni sodir bo‘lgan Prigojin isyonidan so‘ng tuzilgan kelishuvga ko‘ra, Yevgeniy Prigojin va uning “Vagner” kompaniyasi Belarusga ketishi belgilangan edi. Belarus fuqarosi Aleksandr Lukashenko esa mamlakat aholisiga mazkur harbiy kompaniya tarkibiga qo‘shilishga ruxsat bergandi. Ijtimoiy tarmoqlarda Belarusning Mogilyov viloyatida “Vagner” uchun lagerlar qurilishi boshlangani haqidagi xabarlar ham paydo bo‘ldi. Ammo keyinchalik Lukashenkoning o‘zi buni rad qilib, mamlakatda lagerlar qurilmasligini ma’lum qildi.

“Vagner”ning Belarusga ko‘chishi haqidagi xabarlar fonida G‘arb ommaviy axborot vositalarida Prigojinga tegishli harbiy kompaniyaning Belarusdan turib Kiyevga zarba berishi ehtimoli ortgani haqidagi xabarlar tarqaldi.