Ukrainadan qochganlar 1,7 mlndan oshdi. Urushning 12 kuni suratlarda

Ukrainada urush boshlanganiga 12 kun to‘lib, harbiy harakatlarning 13 kuni boshlandi.

O‘tgan 12 kunda Ukrainada BMt ma’lumotlariga ko‘ra, 406 nafar tinch aholi vakili o‘ldirildi, jumladan 27 nafar bola, 800 nafardan ortig‘i jarohatlandi. Ayirmachilar nazoratidagi Donbassda 27 kishi halok bo‘lgan.

12 kun davomida Ukrainani tark etganlar 1,7 mln nafardan oshdi. Ularning katta qismi Polshaga borgan – 1 027 603 nafar. Shuningdek, ukrainlar Vengriya (180 163 nafar), Slovakiya (128169), Moldova (82 762), Ruminiya (78 977),  Rossiya (53 300) va Belarusdan (406) panoh topgan. 183 688 nafar ukrainalik Yevropaning boshqa davlatlariga ko‘chib o‘tgan.

Ayni paytda faol harbiy harakatlar olib borilayotgan Irpen shahridan ikki ming tinch aholi evakuatsiya qilindi.

Xarkovda supermarket binosiga artilleriya o‘qlari tushishi oqibatida bir necha kishi halok bo‘ldi.

Belovej o‘rmonida Rossiya va Ukraina o‘rtasidagi muzokaralarning uchinchi raundi bo‘lib o‘tdi.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.