Ukrainadagi urushda qancha tinch aholi halok bo‘lgani ma’lum bo‘ldi

Rossiyaning Ukrainaga keng ko‘lamli harbiy hujumi boshlanganidan beri mamlakatda 5 767 nafar tinch aholi halok bo‘ldi, 8 282 kishi jarohatlandi. Bu haqda BMTning Inson huquqlari bo‘yicha oliy komissarligi boshqarmasi ma’lum qildi.

“Bugungi kunga qadar biz tinch aholi orasida 14 059 nafar qurbonlarni tasdiqladik: janglarda 5 767 nafar tinch aholi halok bo‘ldi, 8 292 nafari yaralandi. Biz bir necha bor aytganimizdek, real raqamlar ancha yuqori bo‘lishi mumkinligini bilamiz”, deydi BMTning Ukrainadagi monitoring missiyasi rahbari Matilda Bogner.

Birlashgan Millatlar Tashkiloti, shuningdek, ko‘plari hali ham urush zonasidagi ixtisoslashtirilgan muassasalarda qolayotgan nogironlarni evakuatsiya qilishga chaqirdi. BMTning nogironlar huquqlari bo‘yicha qo‘mitasiga ko‘ra, ularni evakuatsiya qilish ustuvor vazifa bo‘lmagan. Biroq, BMT urush zonasidagi nogironlar soniga aniqlik kiritmagan.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi.