Ukraina uchta aholi punktini ruslardan ozod qildi – Bosh shtab

Olam

image
0:00
0:00
download

Ukraina Qurolli kuchlari bo‘linmalari mamlakat janubidagi Orlovo, Zagradovka va Kochubeyevka aholi punktlari ustidan nazoratni tikladi. Bu haqda Ukraina Qurolli kuchlari Bosh shtabi ma’lum qildi.

Bosh shtab ma’lumotlariga ko‘ra, Ukrainaning harbiy-sanoat majmuasi va logistika infratuzilmasida raketa otish xavfi saqlanib qolmoqda. Qora dengizda “Kalibr” dengiz qanotli raketalari bilan jihozlangan kemalar bor, deyiladi xabarda.

Shu bilan birga, RF Qurolli Kuchlarining qo‘shimcha bo‘linmalari urushda qatnashish uchun Ukraina hududiga ko‘chib o‘tishda davom etayotgani aytilmoqda. Donetsk yo‘nalishida Rossiya armiyasining asosiy sa’y-harakatlari Popasnaya, Rubejnoye aholi punktlarini qo‘lga kiritish, shuningdek, Mariupol shahrini egallashga qaratilgan.

Qayd etilishicha, Birlashgan kuchlarning Donetsk va Lugansk yo‘nalishlarida guruhlanishi Rossiya Qurolli kuchlarining kuniga 5 ta hujumini qaytardi, 10 ta tank, 18 ta zirhli va 13 ta avtomobil texnikasi, 15 ta artilleriya tizimini yo‘q qildi.

Ukraina Qurolli Kuchlari Harbiy-havo kuchlari guruhlari bir sutkada 4 ta samolyot, dron va 2 ta qanotli raketani yo‘q qilgan.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.


Maqola muallifi

Teglar

Rossiya-Ukraina urushi Ukrainaga bosqin

Baholaganlar

14

Reyting

3.4

Maqolaga baho bering

Doʻstlaringiz bilan ulashing