Ukrain harbiylarining Mariupoldagi oxirgi “qo‘rg‘on”iga hujum boshlandi

Tan olinmagan Donetsk Xalq Respublikasi (DXR) xalq militsiyasining harbiy guruhlari Mariupoldagi “Azovstal” zavodi hududiga qisman bostirib kirishni boshladi. Bu haqda bugun, 19 aprel kuni DXR harbiy departamenti rasmiy vakili Eduard Basurin ma’lum qildi.

“Ushbu ob’ektga qisman hujum qilish uchun tanlangan guruhlar o‘z ishini boshladi. Bu borada Rossiya Federatsiyasi bizga katta yordam bermoqda – bu aviatsiya va artilleriya. Yaqin kelajakda Ukraina xalqining bu soxta himoyachilari baribir taslim bo‘lishadi. va [Mariupoldagi] odamlar yengil nafas oladilar”, degan Basurin.

Rossiya Mudofaa vazirligi matbuot kotibi Igor Konashenkov avvalroq Ukraina harbiylarining Mariupoldagi qoldiqlari “Azovstal” zavodi hududida to‘sib qo‘yilgan, shaharning qolgan qismi to‘liq tozalanganini ma’lum qilgandi. Unga ko‘ra, “Azovstal”da 2,5 mingga yaqin Ukraina xavfsizlik kuchlari, jumladan, millatchi “Azov” polkining harbiy xizmatchilari va xorijiy yollanma askarlari qolgan. Rossiya harbiylari ularga hayotlarini saqlab qolish evaziga yakshanba kuni Moskva vaqti bilan soat 06:00 dan 13:00 gacha qurollarini tashlashni taklif qilgan.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.