Turkiya qiyin vaziyatda qolgan Ukrainaning iltimosini bajaradimi? 

Avvalroq, rasmiy Kiyev Turkiyadan Rossiya kemalari uchun Bosfor va Dardanell bo‘g‘ozlarini yopishni so‘ragandi. 

Anqara buni amalga oshirishi mumkin, ammo bu vaziyatda ham Rossiya Federatsiyasi flotni bazaga qaytarish huquqiga ega bo‘ladi. Bu haqda Turkiya Tashqi ishlar vaziri Mavlud Chavusho‘g‘li ma’lum qildi.  

“Bugungacha Turkiya Montryo konvensiyasiga rioya qilishdan tortinmadi. Turkiya bo‘g‘ozlardan harbiy kemalarning o‘tishini cheklashi mumkin. Biroq, shuningdek, Montryo konvensiyasi urushda ishtirok etayotgan davlatlarning kemalari o‘z bazalariga qaytishi mumkinligini ko‘rsatadi va ularga buning uchun ruxsat berish kerak”, degan vazir. 

Turkiya ommaviy axborot vositalarining aniqlik kiritishicha, Anqara Rossiya kemalari uchun bo‘g‘ozlarni yopsa, ular Ukraina kemalari uchun ham xuddi shunday yo‘l tutishi kerak — aks holda Turkiya mojaroda taraf olgan deb hisoblanadi.

Rossiyaning Ukrainaga bosqini

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegaradagi tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Buning ortidan Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirdi. Ko‘p o‘tmay Prezident Rossiya bilan diplomatik aloqani uzdi.

Rus qo‘shinlari dastlab Kiyev va Xarkovga raketa hujumi uyushtirdi. Prezident Zelenskiy mamlakatda harbiy holat e’lon qildi. Shuningdek, rasmiy idora rus qo‘shinlari Xarkov va Odessa viloyatiga kirib borganini bildirdi.

Hujum boshlanganidan ko‘p o‘tmay, LXR Ichki ishlar vaziri maslahatchisi Vitaliy Kiselev Schaste va Stanitsa shaharchalari LXR nazoratiga o‘tganini e’lon qildi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.