Rossiyaning Qora dengiz floti shtabiga drondan hujum qilindi

Rossiya Harbiy dengiz kuchlarining Qora dengiz floti shtabiga bugun, 20 avgust kuni drondan hujum uyushtirildi. Bu haqda Sevastopol gubernatori Mixail Razvojayev ma’lum qildi.

“Men [Qora dengiz] flotining shtab-kvartirasidaman. 25 daqiqa oldin tomga dron uchib keldi. Afsuski, ko‘rfazda o‘qotar qurollar bilan ishlagan bo‘lsalar ham, u urib tushirilmadi. U pastlab uchayotgan edi. Qurbonlar yo‘q”, deb yozadi Razvojayev.

Uning qayd etishicha, hozirda flot shtab-kvartirasiga yaqinlashish va kirish yo‘llari politsiya tomonidan to‘sib qo‘yilgan. Sevastopol gubernatori aholidan uyda qolishni so‘radi.

“Barcha xizmatlar joyida, ishlayapmiz. Tinchlikni saqlang va yaqin soatlarda imkon qadar uyda qoling”, deya qo‘shimcha qildi u.

Oradan ko‘p o‘tmay, G‘arbiy Qrimda havo hujumidan mudofaa tizimi ishga tushgani, nishon yo‘q qilingani va qurbonlar yo‘qligi haqida xabarlar paydo bo‘ldi. Bu haqda Qrim avtonom respublikasi rahbari Sergey Aksenov ma’lum qildi.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.