Rossiya urushni tugatmoqchi emas – Zelenskiy

Olam 10148
image

Agar Rossiya haqiqatan ham urushni tugatishni istasa, zaxiralarini mamlakat janubiga o‘tkazmaydi. Bu haqda Ukraina Prezidenti Vladimir Zelenskiy aytib o‘tdi.

“Agar Rossiya haqiqatan ham urushni tugatishni xohlasa, hozir Ukraina janubiga zaxiralarni tortib kelmagan bo‘lardi va Ukraina hududida o‘ldirilgan begunoh odamlarning ommaviy qabrlarini yaratmas edi”, degan u kecha, 3 avgust kuni kechqurun videomurojaatida.

Zelenskiyning ta’kidlashicha, “Moskva yangi tashviqot ishlariga tayyorgarlikni boshlagan. Ular kutilmaganda “azovchilar”ni terrorchilar deb topdi, vaholanki terroristik davlatning bunday qilish bema’nilikdir”.

“Ular terrorchi davlat go‘yoki muzokaralar o‘tkazishni xohlayotgani haqidagi tezislar bilan turli emissarlarni faollashtiradi”, deydi Zelenskiy.

Ukraina rahbari Yevropa qadriyatlariga ega bo‘lgan qudratli davlatlarning sobiq rahbarlari ushbu qadriyatlarga qarshi kurashayotgan Rossiya uchun ishlayotganini “jirkanchlik” deb atagan.

Shu bilan birga, Zelenskiy Shveysariyaga YeIning Rossiyaga qarshi sanksiyalarining yettinchi paketiga qo‘shilgani uchun minnatdorlik bildirgan.

“Bunday davlat qadriyatlar va insoniy axloqni himoya qilishda betaraf qolmagani butun dunyo uchun juda kuchli signaldir”, degan u.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.

Sunnatilla Abdullayev
Maqolaga baho bering
Baholaganlar: 30
Reyting: 3.2
t
×