Rossiya Ukrainaga qancha asirni qaytarib bergani ochiqlandi

Rossiya va Ukraina harbiy asirlar hamda halok bo‘lgan harbiy xizmatchilarning jasadlarini almashish bo‘yicha 27 ta operatsiya o‘tkazdi. Bu haqda Rossiya Mudofaa vaziri o‘rinbosari Aleksandr Fomin bugun, 3 avgust kuni bo‘lib o‘tgan brifingda ma’lum qildi.

“Xalqaro Qizil Xoch qo‘mitasi ishtirokida Kiyev bilan harbiy asirlar va halok bo‘lgan harbiy xizmatchilarning jasadlarini almashish bo‘yicha muloqot tashkil etildi. Shu kungacha 27 ta shunday operatsiya o‘tkazildi”, deydi Fomin.

Uning aytishicha, Rossiya Federatsiyasi Mudofaa vazirligida harbiy asirlar uchun doimiy tibbiy komissiya tuzilgan va Ukraina harbiylarini Vataniga qaytarish ishlari o‘z vaqtida amalga oshirilmoqda.  Xususan, 18 kishi Vataniga o‘tkazilgan. 

“Rossiya Mudofaa vazirligida kasal va yarador harbiy asirlarni tekshirish uchun doimiy tibbiy komissiya tuzildi. Komissiya Jeneva konvensiyasiga asoslangan tavsiya va tamoyillar asosida ishlaydi. Ukraina harbiylarini vataniga qaytarish ishlari ham o‘z vaqtida amalga oshirilmoqda.Komissiya qarorlariga ko‘ra, ayni damda 18 kishi Ukrainaga topshirildi”, deydi u.

Rossiya-Ukraina urushi

Joriy yilning 21 fevral kuni Rossiya Prezidenti Vladimir Putin Kremlda Ukraina sharqidagi o‘zini mustaqil deb e’lon qilgan Lugansk xalq respublikasi (LXR) va Donetsk xalq respublikasini (DXR) tan olish to‘g‘risidagi farmonni imzoladi. Keyinroq RF respublikalarni shu nomdagi viloyatlar chegarasida tan olganini ta’kidlab, Ukrainaga qarshi urush xavfini oshirib yubordi.

Putinning favqulodda qarori ortidan AQSH, YeI, Kanada, Avstraliya, Buyuk Britaniya va Yaponiya rasmiylari ham Rossiyaga qarshi sanksiyalar kiritdi.

24 fevral kuni Rossiya Prezidenti Vladimir Putin Ukraina sharqida Donbassda rus harbiylari "maxsus harbiy operatsiya" boshlaganini e’lon qildi va rus qo‘shinlari Ukrainaga hujum boshladi. Putin bu harakatini Ukraina sharqidagi rossiyaparast separatist kuchlar rahbarlari shunday so‘rov yuborgani bilan oqladi.

Bundan avvalroq Zelenskiy Rossiya fuqarolariga rus tilida murojaat qilib, ukrainlarga “na sovuq, na issiq, na gibrid urush kerak emas”ligini, ukrainlar hujumchilarni kutib olishga tayyorligini bildirgandi. Ko‘p o‘tmay Prezident Rossiya bilan diplomatik aloqani uzdi. Prezident Zelenskiy mamlakatda harbiy holat e’lon qildi.

25 fevral kuni Zelenskiy Ukrainada umumiy harbiy safarbarlik e’lon qildi. Armiyaga chaqiruv mamlakatning qator viloyat va shaharlarida amalga oshirilishi belgilandi.

Rus qo‘shinlari hozirgacha Ukrainaga shimol, sharq va janubdan hujum qilib kelmoqda va qator hududlarni egallashga erishdi. Ammo bu urush Rossiyaning dunyoda yakkalanib qolishiga olib keldi.

Ukrainaga hujum boshlanishi Rossiya iqtisodiga og‘ir zarba berdi. Rus kompaniyalari aksiyalari keskin arzonlashdi, Moskva birjasida savdolar mislsiz darajada pasayish bilan o‘tdi. Gazprom, LUKOYL va boshqa yirik kompaniyalar yo‘qotishlarga uchradi.

Hujum boshlangach, Yevropa davlatlari va AQSH Rossiyaga qarshi bir necha bosqichli sanksiyalar joriy qildi. Rossiyaning VTB, “Rossiya” banki, “Otkritiya”, “Novikombank”, “Promsvyazbank”, “Sovkombank” va VEB.RF banklari SWIFT xalqaro banklararo tizimidan uzildi. AQSH va Yevropa Ittifoqi Rossiyaning oltin-valyuta zaxirasini blokladi.

Yevropa davlatlari, AQSH, Kanada Rossiya uchun o‘z havo hududini yopdi. Bu sanksiyalarga neytral davlat hisoblangan Shveysariya ham qo‘shildi. Urush fonida Ukrainani Yevropa Ittifoqi a’zoligiga qabul qilish jarayoni tezlashdi.